ხულოს მუნიციპალიტეტის სოფელ დანისპარაულში ახალი საჯარო სკოლა აშენდება

ხულოს მუნიციპალიტეტის სოფელ დანისპარაულში ახალი საჯარო სკოლა აშენდება.  აჭარის მთავრობის ინფორმაციით, თანამედროვე სტანდარტების, 120 მოსწავლეზე გათვლილი სკოლა სრულად აღიჭურვება საჭირო ინვენტარით. ასევე, მოეწყობა ღია სპორტული მოედანი.

დასკვნით ეტაპზეა მაღალმთიანი აჭარის გაზიფიცირების პროექტი. ამ ეტაპზე რიყეთი-ზარზმის მონაკვეთზე მიმდინარეობს ცენტრალური გაზის მაგისტრალის 7 კილომეტრიანი მონაკვეთის მშენებლობა. პროექტის პირველი ეტაპი უკვე დასრულებულია, რაც დაახლოებით 12 000-მდე აბონენტის გაზიფიცირებას უზრუნველყოფს, ხოლო მეორე ეტაპის დასრულების შემდეგ, დამატებით 15 200-მდე აბონენტის გაზიფიცირება განხორციელდება.

კურორტ გოდერძიზე დასრულდა სამსართულიანი ადმინისტრაციული შენობის მშენებლობა, სადაც შპს ,,გოდერძი რეზორტი", კურორტების განვითარების სააგენტო, საპატრულო პოლიციისა და საგანგებო სიტუაციების კოორდინაციისა და გადაუდებელი დახმარების მართვის ცენტრი დაიწყებს ფუნქციონირებას.

მაღალმთიან აჭარაში ინფრასტრუქტურული პროექტების მშენებლობის მიმდინარეობას სულხან თამაზაშვილი გაეცნო.