სირთულეებით, ახალი გამოწვევებით და პროტესტებით დატვირთული წელი, კიდევ უფრო მძიმედ დასრულდა. მოსახლეობას, ახალი წლიდან მოუწევს, შუქის მრიცხველები აკონტროლოს და როგორმე თვეში 300 კილოვატში ჩაეტიოს. სხვა შემთხვევაში, ხელისუფლება გაზრდილი ელექტროენერგიის ტარიფს, არ ასუფსიდირებს. ფიზიკური პირებისთვის იგი 3-დან 4 თეთრამდე, მეწამეებისთვის 11-დან 14 თეთრამდე გაძვირდა.
2020 წელს მოხდა ლარის რეკორდული გაუფასურებაც. მაქსიმუმს, მარტში მიაღწია, როცა ერთი ამერიკული დოლარი ეროვნული ბანკის მონაცემებით, 3.48 თეთრი ღირდა. გაცილებით მეტი, სავალუტო ჯიხურებში. საქსტატის მიხედვით, ქვეყანაში გაზრდილია სიღარიბის დონე და შემცირებული ეკონომიკა. ამ რეალობის ფონზე კი თბილისის მერიამ, წინასაახალწლოდ, აფრიკის დასახლებაში ოჯახებს ტრაქტორებით მიაკითხა და უნებართვო საცხოვრებლები დაუნგრია.
2020 წლის დასაწყისიც ისეთივე მძიმე იყო, როგორიც დასასრულია. ახალმა კორონავირუსმა საქართველოს საზღვრებში შემოაღწია. თებერვლიდან, დღემდე გავიარეთ საგანგებო მდგომარეობა, შეზღუდვების დაწესების და მისი გაუქმების რამდენიმე ეტაპი და ისევ არასრული ლოქდაუნის რეჟიმი.
თუმცა მართვაში ეს ყველაზე რთული მაინც არ ყოფილა. ჯერ კიდევ მიმდინარე წელში ემსხვერპლა კორონავირუსს ყველაზე მეტი სიცოცხლე. კოვიდ 19-ის და სახელმწიფო პოლიტიკის შედეგად, 2020 წელი ინახავს პერმანენტული აქციების ქრონიკებს. იმ ადამიანების გამოსვლებს ქუჩაში, ვინც საარსებოს გარეშე დარჩა და ვინც, ვერც ერთჯერადი და ვერც რამდენიმეთვიანი კომპენსაციებით ისარგებლა.
განსაკუთრებით დამაშინებელი გარემო - ასე შეფასდა წლის ყველაზე მნიშვნელოვანი მოვლენა - 31 ოქტომბრის საპარლამენტო არჩევნები, რომლის შედეგადაც ისტორიული სხდომების მომსწრე გავხდით. საბჭოთა კავშირის დაშლის შემდეგ, 21-ე საუკუნეში, პირველად მივიღეთ ორი ერთპარტიული საკანონმდებლო ორგანო - ქვეყნის პარლამენტი და აჭარის უმაღლესი საბჭო.
მიუხედავად იმისა, საერთო ჯამში ოპოზიციამ მმართველ გუნდზე მეტი ხმა მოიპოვა, კენჭისყრის შედეგების თანმდევი პროცესი იყო ოპოზიციის ბოიკოტი, რომელიც დღემდე გრძელდება. ოპოზიციურად განწყობილ მოსახლეობასთან ერთად, ისინი გაყალბებულ არჩევნებს პროტეტსტის უკიდურესი ფორმით დაუპირისპირდნენ. ბარიერ გადალახულმა სუბიექტებმა უარი თქვეს მანდატებზე და ქუჩაში კარვები გაშალეს. ისინი დღემდე ითხოვენ რიგგარეშე არჩევნების ჩატარებას და ცესკო-ს თავმჯდმარის გადადგომას.
ქუჩაში ბრძოლის პარალელურად ჩაინიშნა მეორე ტურები ქვეყნის რამდენიმე რეგიონში და დედაქალაქში. აჭარაში ყველა ოლქში, გარდა ქობულეთისა. ერთმანეთის პირისპის ორი პოლიტიკური ძალა "ქართული ოცნება" და "ერთიანი ნაციონალური მოძრაობა-ძალა ერთობაშია" აღმოჩნდა. ოპოზიცია მეორე ტურს ამ შემთხვევაშიც განუდგა. ამომრჩევლისთვის ჰქონდათ მოწოდება, არ მისულიყვნენ საარჩევნო უბნებზე.
წლის მნიშვენლოვან მოვლენებს შორისაა აშშ-ს სახელმწიფო მდივნის მაიკ პომპეოს საქართველოშ ვიზიტი. იგი ერთდროულად ემთხვევა პოსტ არჩევნების და მთიან ყარაბახში გამწვავებული კონფლიქტის პერიოდს.
არჩევნებისა და "ქართული ოცნების" მიდგომების წყალობით, რამდენიმე მუნიციპალიტეტმა დაკარგა არჩეული მერი. აჭარაში, ასე შუახევის მუნიციპალიტეტის შემთხვევაში მოხდა. ფრიდონ ფუტკარაძე მმართველმა გუნდმა უმაღლეს საბჭოში გადაიყვანა.
მანამდე, აჭარის მთავრობის თავმჯდომარემ ბათუმის მერიც შეცვალა. ლაშა კომახიძე არჩევითი თანამდებობიდან გაუშვა და ახლა ქალაქს, დანიშნული მერი ჰყავს.
თამარ ბაჩალიაშვლის ბურუსით მოცული მკვლელობა, რომელზეც შსს-მ საქმე დახურა, ოჯახი კი ისევ სამართალიან გამოძიებას ითხოვს, ასევე დაუსრულებელი ძიება გიორგი შაქარაშვლის მკვლელობის საქმეზე და სხვა - 2020 წელი დასამახსოვრებელი აღმოჩნდა გახმაურებული საქმეებით. წლის განსაკუთრებული დანაშაულია ზუგდიდში ყაჩაღური თავდასხმის საქმე საქართველოს ბანკზე. ბრალდებული ესებუა ხელისუფლებას რამდენჯერმე დასუხლტა ხელიდან.
2020 წლის ოქტომბრის დასაწყისი ტრაგიკული აღმოჩნდა კიდევ რამდენიმე ოჯახისთვის აჭარაში. უამინდობის შედეგად განვითარებულმა მეწყრულმა პროცესმა, სოფელ ქვედა ჯოჭოში, ცოცხლად დამარხა ხუთი ადამიანი. მათგან სამი ერთი ოჯახის წევრი იყო. ადიდებულმა მდინარემ კი ერთი ადამიანი გაიყოლა, რომელიც ვერ იპოვეს.
რამდენიმე დღის წინ, 87 წლის ასაკში გარდაიცვალა ჟურნალისტი, ტელეწამყვანი და მსახიობი ჯულიეტა ვაშაყმაძე.
წელს, უპრეცედენტო წარმატებას მიაღწია გურიაში, ქალთა საფეხბურთო კლუბმა „ლანჩხუთმა“. გუნდმა უეფას ჩემპიონთა ლიგის საკვალიფიკაციო ეტაპზე გაიმარჯვა და ქართული ფეხბურთის ისტორიაში გახდა პირველი გუნდი, რომელმაც უეფას საკლუბო ტურნირის მეორე საკვალიფიკაციო ეტაპის საგზური მოიპოვა.