დეპუტატის ოჯახის არადეკლარირებული კომპანიები, შემოსავალი და ნაჩუქარი ბინები - „საერთაშორისო გამჭვირვალობა საქართველო“ კვლევის შედეგებს აქვეყნებს, რომლის თანახმადაც ანზორ ბოლქვაძე კაპიტალის ნაწილს მალავს. ორგანიზაცია შესაძლო დარღვევების გამოვლენის მიზნით, თანამდებობის პირების ქონებრივი დეკლარაციებს პერიოდულად სწავლობს. ხულოს, შუახევისა და ქედის მაჟორიტარი დეპუტატის არადეკლარირებული ქონების დეტალები ნახეთ სიუჟეტში.
სამეწარმეო საქმიანობაში მონაწილეობის შვიდი ფაქტი და ოთხი ქონება - ეს საკუთრებაა, რომელიც გასული წლის ქონებრივ დეკლარაციაში ანზორ ბოლქვაძეს მითითებული არ აქვს. პარლამენტში ხულო-შუახევი-ქედის მაჟორიტარი დეპუტატის ოჯახის ქონებრივი დეკლარაცია
„საერთაშორისო გამჭვირვალობა საქართველო“-მ გამოიკვლია. კვლევის მიხედვით, ანზორ ბოლქვაძის ოჯახმა შპს Goderdzi Resorts-ის და ხულოს მერიის შესყიდვებიდან 156,073 ლარი მიიღო. ორგანიზაცია არასრულად შევსებული დეკლარაციით დარღვეულ კანონმდებლობაზე მიუთითებს.
კვლევის მიხედვით, სამეწარმეო საქმიანობის არადეკლარირებულ ფაქტებს შორისაა 50%-იანი წილი „გოდერძი დეველოპმენტში“, რომელსაც კანონმდებელი 2017 წლიდან ფლობს. არადეკლარირებული ქონების გარდა, კიდევ ერთ კანონდარღვევაზე მიუთითებს ორგანიზაცია. აღმოჩნდა, რომ მას წილის მართვა სხვა პირისთვის მინდობით გაცემული არ აქვს.
მხოლოდ 2019 წლის 1 მაისს შევსებულ დეკლარაციაში გამოჩნდა ანზორ ბოლქვაძის მეუღლის თინა ბოლქვაძის სახელზე 2012 წლიდან რიცხული 100%-იანი წილი შპს „ფონი“-ში. თავის მხრივ, ამ შპს-ეს ეკუთვნის სასტუმრო „ხულო“, სადაც „ENPARD ხულოს“ პროექტის ფარგლებში საოფისედ ფართი ნაქირავები აქვს „ჩეხეთის რესპუბლიკის კარიტასს საქართველოში“. დეკლარაციაში არც ამ შემოსავლის შესახებაა აღნიშნული.
2019 წლიდან, თინა ბოლქვაძე ასევე ფლობს „აისი გოდერძის” 33.3%-ს. მანამდე წილს ანზორ ბოლქვაძის შვილი, ნოდარ ბოლქვაძე ფლობდა. 2017-2019 წლებში კომპანიამ აჭარის ავტონომიური რესპუბლიკის კუთვნილი შპს „Goderdzi Resorts”-ისგან 136,028 ლარის სახელმწიფო შესყიდვები მიიღო. ფაქტი არცერთ დეკლარაციაშა ასახული.
არ ჩანს ასევე ბათუმში, ჯავახიშვილის 31-ში მდებარე 122 კვარდატული მეტრი ბინა, ხულოში, რუსთაველის 9-ში არსებული 100 კვ.მ. ფართის სარდაფი, ასევე ხულოში, აბაშიძის 12-ში 400 კვ.მ. ფართობი და თბილისში, სამტრედიის ქუჩის 50-ში მდებარე კორპუსში ორანჟერეა ჯამში 84 კვ. მ.
ანზორ ბოლქვაძის ქონებრივ დეკლარაციაში არც შვილის, ნოდარ ბოლქვაძის სამეწარმეო საქმიანობებია მითითებული. ფლობს შპს-ებს: „გადახურვის სერვისს“, „ნიას“, „რეფლაიდ თბილისს“, აქვს წილი შპს „ბი-ემ-სი“-ში. აღნიშნული კომპანიების სახელზე, სახელმწიფო შესყიდვებიდან მიღებული აქვს მილიონ ნახევარ ლარზე მეტი.
„საერთაშორისო გამჭვირვალობა - საქართველო” მოუწოდებს საჯარო სამსახურის ბიუროს, მოკვლეული ინფორმაციის საფუძველზე მოახდინოს კანონით გათვალისწინებული რეაგირება.
TV 25 მაღალმთიანი აჭარის მაჟორიტარს დაუკავშირდა, თუმცა ანზორ ბოლქვაძემ კომენტარის გაკეთებას მოგვიანებით შეგვპირდა, მას შემდეგ, როდესაც იგი აღნიშნულ კვლევას გაეცნობა.
5
s
s
s