29, იანვარი 2019 20:03:00
დღეს ქალაქი საპროტესტო ტალღის ეპიცენტრი იყო. ახალგაზრდებმა განათლების სისტემაში დაგეგმილი ცვლილებები გააპროტესტეს. მე-12 კლასელებმა მოითხოვეს, საატესტატო გამოცდები მე-11 კლასელებთნ ერთად მათაც მოუხსნან. რატომ ჩათვლეს სკოლის მოსწავლეებმა,რომ ბატიაშვილის უწყებამ მათი ინტერესები არ დაიცვა?
პროტესტს ახლა ის მოსწავლეები გამოთქვამენ, რომლებსაც მე-12 კლასის შიდა სასკოლო გამოცდების ჩაბარება უწევთ. მიაჩნიათ რომ, განათლების სამინისტროს მათი ინტერესებიც უნდა გაეთვალისწინებინა და გადაწყვეტილება ამის შემდეგ მიეღო. ამბობენ, რომ საატესტატო გამცოდების პარალელურად, მათ უმაღლეს სასწავლებელში მისაღები გამოცდებიც აქვთ ჩასაბარებელი, რისთვისაც რეპეტიტორებთან მომზადება უწევთ.
მე-12 კლასის მოსწავლეების პროტესტი საქართველოს განათლების სამინისტროს იმ გადაწყვეტილებამ გამოიწვია, რომლის მიხედვითაც, მიმდინარე წელს, 11-ე კლასელებს მათგან განსხვავებით საატესტატო გამოცდების ჩაბარება აღარ მოუწევთ.
საპროტესტო მსვლელობის შემდეგ მოსწავლეებს აჭარის განათლების კულტურისა და სპორტის მინისტრი შეხვდა. ინგა შამილიშვილი ირწმუნება, რომ 12-ე კლასელების მოთხოვნას საქართველოს განათლების სამინისტროს აუცილებლად მიაწვდის.
მიუხედავად მინისტრის დაპირებისა მოსწავლეებმა საპროტესტო აქცია რამდენიმე საათში იგივე მოთხოვნით განაახლეს. ისინი მინისტრს უნდობლობას უცხაადებენ და უწყებისგან დროულ რეაგირებას მოითხოვენ.
გარდა მე-12 კლასის შიდა გამოცდების მოხსნისა, 2020 წლის მისაღებ გამოცდებთან დაკავშირებითაც ცვლილებები იგეგმება. ქართული ენისა და ლიტერატურის, ასევე, უცხო ენის ჩაბარება ყველა აბიტურიენტისათვის სავალდებულო იქნება, რაც შეეხება ზოგად უნარებს, უმაღლესი სასწავლებელების პროგრამების მიხედვით არჩევითი გახდება.
სავარაუდოდ, მე-12 კლასის მოსწავლეები აქციას ხვალაც განაახლებენ.