25, ივლისი 2019 20:45:00
ლარი დევალვაციას განაგრძობს. ეროვნული ვალუტა ისტორიულ მინიმუმზეა. 1 დოლარის შესაძენად დღეს 2 ლარისა და 92 თეთრის გადახდა მოგიწევთ. გაძვირებული ცხოვრება და ამ ფონზე შემცირებული შემოსავლები. რა ვერ გათვალა ხელისუფლებამ ?. ეკონომისტების შეფასებები, მოსახლეობის მოლოდინები და ექსპერტების პროგნოზები. სულხან მესხიძე გაეცნო ყველა მხარის პოზიციას,
ეროვნული ვალუტა ისტორიულ მინიმუმზეა. 1 დოლარის ოფიციალური ღირებულება 2 ლარი და 90 თეთრი გახდა, თუმცა ციფრები გაცილებით მაღალია სავალუტო ჯიხურებში, სადაც 1 დოლარის შეძენა უკვე 2 ლარად და 92 თეთრადაა შესაძლებელი. მოიმატა ევროს ფასმაც, რომელიც უკვე 3 ლარს და 25 თეთრს აღემატება. დოლარის და ევროს ფასი საგანგაშოდ მაღალია კომერციულ ბანკებში, სადაც 1 დოლარი 2 ლარი და 96 თეთრი, 1 ევრო კი 3 ლარი და 31 თეთრი ღირს
ლარის კურსის კიდევ უფრო ვარდნის მიზეზად ეკონომისტები ისევ მთავრობის არასწორ ეკონომიკურ პოლიტიკას ასახელებენ. მათი თქმით, ვალუტის კურსი, პირდაპირ ასახავს ქვეყანაში არსებულ ეკონომიკურ მდგომარეობას. სპეციალისტები ამბობენ, რომ მნიშვნელოვანი პრობლემა მოსახლეობაში არსებული უაყოფითი მოლოდინებია, რომლის მართვასაც მთავრობა ვერ ახერხებს.
დოლარის გაძვირებასთან ერთად, თანდათან ძვირდება ცხოვრებაც. მომატებულია, როგორც საწვავის და მედიკამენტების, ისე პროდუქტის ფასებიც. მოვაჭრეები ამბობენ, რომ ბაზარში თითქმის ყველა სახის პროდუქტი გაძვირდა, შესაბამისად იკლო მყიდველმაც.
არის თუ არა მოსალოდნელი ლარის კიდევ ერთი ანტირეკორდი - ეკონომისტებს პროგნოზების გაკეთება უჭირთ, თუმცა ამბობენ, რომ გამყარების მოლოდინი აღარ აქვთ. მათი თქმით, ლარი უკვე წლებია უფასურდება, თუმცა მთავრობას და ეროვნულ ბანკს, გეგმა, თუ როგორ უნდა გამოვიდეს ქვეყანა სავალუტო კრიზისიდან დღემდე არ აქვთ.