16, აპრილი 2020 17:04:00
საქართველოში კორონავირუსის პირველი შემთხვევის დაფიქსირებიდან ზუსტად 50 დღე გავიდა. ქვეყანა ამ წუთამდე 300-ზე მეტ ინფიცირებულს ითვლის. ინფექციონისტები, ექიმები და ჯანდაცვის სფეროს წარმომადგენლები ამბობენ,რომ უკვე პიკს ვუახლოვდებით და მომდევნო ერთი კვირა განსაკუთრებით მძიმე იქნება. ამ ფონზე, დღეს ამირან გამყრელიძემ პირველად სიტყვები „ნუ წახვალთ ეკლესიაში“. სად გადის ზღვარი რწმენასა და სიფრთხილეს შორის? დღეს დიდი ხუთშაბათია, ხვალ წითელი პარასკევი, წინ კი აღდგომის დღესასწაულია. ეკლესიები და ტაძრები კი მრევლით სავსეა.
ქვეყანაში, ვირუსის გავრცელების მასშტაბების მიუხდედავად, დიდი ხუთშაბათის მსახურებაზე, ბათუმის საკათედრო ტაძარი მრევლით სავსე იყო. ლიტურგია ეკლესიის ეზოში, ზიარებით დასრულდა. მორწმუნეები ერთი კოვზით ეზიარნენ.
ხვალ, წითელ პარასკევს, გარდამოხსნის ცერემონიალი ტაძრებში 2 საათზე დაიწყება. მრევლისთვის დასწრება თავისუფალია. რაც შეეხება სააღდგომო ღვთისმსახურებას, ბათუმისა და ლაზეთის ეპარქიაში შემავალ ტაძრებში იგი განსხვავებული იქნება, რაც იმას ნიშნავს, რომ წირვა-ლოცვა ღამისთევით ჩატარდება, თუმცა მრევლი ღვთისმსახურებაზე დასწრებას ვერ შეძლებს. განცხადება ეპარქიის პრეს-სპიკერმა, დეკანოზმა იოანე გორელიშვილმა გააკეთა.
მიუხედავად იმისა, ბათუმის ღვთისმშობლის შობის საკათედრო ტაძარში, დღეს, ხალხმრავლობა იყო და ღვთისმსახურების გამოტოვებას არც ხვალისთვის აპირებენ, მრევლი მზადაა ბათუმისა და ლაზეთის მიტროპოლიტის, მეუფე დიმიტრის გადაწყვეტილებას დაემორჩილონ და სააღდგომო ღვთისმსახურებაზე კვირას დილით მივიდნენ.
იმის გათვალისწინებით, რომ მორწმუნეებს არ მოუხდეთ კომენდანტის საათის დარღვევა, აჭარაში მოქმედ ტაძრებში, ეპარქიის გადაწყვეტილებით, ღვთისმსახურება მრევლისთვის კვირას, დილის 7 საათზე დაიწყება.