ახლა ვნახოთ დაპირებული რეპორტაჟი პრობლემაზე, რომელიც აჭარაში მცხოვრებ ფერმერებს წლებია აწუხებთ. მიწის რეგისტრაცია. რატომ იწელება პროცედურები დროში- რას პასუხობენ ფერმერებს? პანდემიის ფონზე ხელისუფლებამ სოფლის მეურნეობა პრიორიტეტად დაასახელა, ანტიკრიზისულ გეგმაში შეღავათებიც დააწესა და უფრო მეტიც, მიწის რეფორმის კიდევ უფრო გამარტივებაზე ისაუბრა. როგორ უნდა გადაჭრას ანტიკრიზისულმა გეგმამ რეგიონში, სოფლად მცხოვრებელების პრობლემები?
გურამ ასამბაძე მიწის რეგისტრაციისთვის, რომელსაც გასული საუკუნიდან ამუშავებს, ერთი წელია იბრძვის. შედეგი ვერა და ვერ მიიღო. მიწის ფართობი, რომლის დაკანონებაც სურს, საკარმიდამო ნაკვეთს ემიჯნება.
საკუთრებაში არსებული მიწის მომიჯნავე ფართობის საკუთრებად აღაირებას ამაოდ ცდილობს ნოდარ დიასამიძეც სოფელ თხილნარში. სურს, ქონება მეუღლის სახელზე გააფორმოს, თუმცა როგორც განუმარტავენ, მეუღლე ცალკე კომლად 2007 წლამდე უნდა დაერეგისტრირებინა.
სარგებლობაში არსებული მიწის ნაკვეთების აღიარების მოთხოვნით, მხოლოდ 2018 წლიდან 2020 წლის აპრილამდე პერიოდში, ხელვაჩაურის მიწის აღიარების კომისიაში 2 100 განაცხადი შევიდა. მათგან დადებითად 539 გადაწყდა. დარჩენილი ნაშთის გარდა, კომისიაში შესული სხვადასხვა შუალედური კორესპოდენციები კი 2 000-სს აღემატება.
მიწის რეგისტრაციის პროცედურების გამარტივებისთვის საკანონმდებლო ცვლილებები მთავრობამ გასული წლის ნოემბერში დაამტკიცა, თუმცა პანდემიის პირობებში, საკითხს საქართველოს მთავრობა რამდენიმე დღის წინ გამართულ სამუშაო შეხვედრაზე დაუბრუნდა. როგორც მთავრობის ადმინისტრაციის მიერ გავრცელებულ მასალაშია საუბარი, იგეგმება მიწების სისტემური რეგისტრაცია, რომელიც ეტაპობრივად, სამი წლის განმავლობაში გაგრძელდება.
ქვეყანაში მიწის რეგისტარციის პროცესი წლებია მიმდინარეობს. „ქართული ოცნების“ ხელისუფლების პირობებში კი რეფორმაზე სამუშაოები 2016 წლიდან დაიწყო. 2020 წლამდე იგი სამჯერ გამარტივდა ამის მიუხედავად კი ფერმერებს ქონების დაკანონება დღემდე უჭირთ.
3
s
s
s