უკიდურესად გაჭირვებული ოჯახი, რომელთა ბედი პანდემიის დროს ხელისუფლებას არ მოუკითხავს. 4 წევრიან ოჯახში, სამი მძიმე ქრონიკული პაციენტია. პაქსაძეებს სოციალური დახმარებაც მოუხსნეს და თავს მოხუცებული ქალის ასაკობრივი პენსიით ირჩენენ. უჭირთ კომუნალური გადასახადების დაფარვა და მედიკამენტების შეძენაც. რატომ დატოვა სოციალური მომსახურების სააგენტომ ისინი საარსებო წყაროს გარეშე? სააგენტოში დახმარების შეწყვეტის მიზეზად ქულათა მაღალი შეფასება დაასახელეს.
მურმან პაქსაძის ოჯახი ბათუმში ერთ-ერთი თვალსაჩინო მაგალითია იმისა, თუ როგორ დაამძიმა კორონავირუსის პანდემიამ ისედაც უკიდურესად გაჭირვებული ოჯახი. ოთხწევრიანი ოჯახში სამი მძიმე ქრონიკული პაციენტია. 47 წლის კაცი ციროზს წლებია ებრძვის. მისი მოხუცებული დედა ინსულტის შემდეგ ლოგინად ჩავარდა. მურმანს კიდევ ერთი ძმა ყავს. მას მეოთხე სტადიის ყელის კიბო აქვს. ოჯახი თავს, მოხუცებული ქალის ასაკობრივი პენსიით ირჩენს. მურმან პაქსაძის მეუღლე უმუშევარია. თავის გატანაში მეზობლები ეხმარებიან.
ოჯახი ბენზეში, ე.წ. სოციალურ სახლში ცხოვრობს. იქ სიმბოლურ ფასად, ერთ ლარად სახელმწიფომ ხუთი წლის წინ შეასახლა. დღეს ისინი ელექტროენერგიის მიწოდების შეწყვეტის საფრთხის წინაშე აღმოჩნდნენ. როგორც მურმანი ამბობს, გასულ თვეში ჟანგბადის აპარატი იმაზე მეტად მოიხმარა, ვიდრე მანამდე, შესაბამისად მომატებული დანახარჯის გადახდას ვეღარ ახერხებს.
ოჯახი ყოველთვიური სოციალური დახმარების მიმღები არ არის. ბაზიდან რვა თვის წინ ამორიცხეს, სწორედ იმ დროიდან, როცა სოციალური მომსახურების სააგენტომ გაიგო, რომ სახელმწიფოსგან ბინა ერთ ლარად მიიღო. სააგენტოს აჭარის ფილიალის ხელმძღვანელი, თემურ ქარცივაძე ამბობს, რომ პაქსაძეების სარეიტინგო ქულა მათი სოციალური მდგომარეობის მიუხედავად მაინც მაღალია.
აღუდგება თუ არა პაქსაძეებს დაკარგული სტატუსი, ეს იმაზეა დამოკიდებული, რამდენ ქულას მიანიჭებს სააგენტო განმეორებითი შესწავლის შემდგომ. რაც შეეხება შეღავათებს კომუნალური სერვისებისთვის, ენერგოკომპანია მას არ უნულებს. რასაც „ენერგო-პრო-ჯორჯია“ ასეთ შემთხვევებში აკეთებს, ის არის, რომ აპრილის თვის ვალდებულებას ოჯახებს მომდევნო თვეებზე უნაწილებს და მიმდინარე გადასახადებთან ერთად ახდევინებს.
3
s
s
s