01, ივნისი 2020 17:06:00
თითქმის სამთვიანი პაუზის შემდეგ ტანსაცმლისა და ფეხსაცმლის მაღაზიებმა, მათ შორის მოლებმაც სამუშაო პროცესი განაახლეს. დაწესებული შეზღუდვები მოიხსნა იმ კაფე-რესტორნებისთვისაც, რომელთაც ღია ტიპის ტერასები ან აივნები აქვთ. რა რეკომენდაციების გათვალისწინება მოუწევთ მეწარმეებს? ვნახოთ სიუჟეტი.
ქალაქი ცხოვრების ჩვეულ რიტმს უკვე დაუბრუნდა. იშვიათი გამონაკლისების გარდა მუშაობა დილიდან განაახლეს ტანსაცმლისა და ფეხსაცმლის მაღაზიებმა, ასევე სავაჭრო ცენტრებმა. შეზღუდვების მოხსნის პარალელურად, ისევ ძალაშია გარკვეული მოთხოვნები. აუცილებელი პირობაა დეზობარიერები, პირბადის გამოყენება როგორც სერვისი მიმწოდებლების, ისე მომხმარებლებისთვის, დახურულ სივრცეში შესვლისას აუცილებელია თერმოსკრინინგი.
ხანგრძლივი პაუზის შემდეგ, მომხმარებლისთვის გაიხსნა საყოფაცხოვრებო სავაჭრო ბაზრობები. საქმიანობა მოვაჭრეებმა გასაყიდ პროდუქციაზე გაზრდილი ფასებით განაახლეს. ამბობენ, რომ ღირებულების გაზრდა ლარის გაუფასურებას უკავშირდება. მოვაჭრეები საუბრობენ იმ მძიმე ეკონომიკურ მდგომარეობაზე, რომელშიც ბოლო სამი თვის განმავლობაში აღმოჩნდნენ.
სრულ სერვისს კაფე-ბარები და რესტორნები 8 ივნისიდან აღადგენენ, დღეიდან კი სერვისს მომხმარებლებს ის კვების ობიექტები აწვდიან, რომლებსაც ღია ტიპის ტერასები ან აივნები აქვთ. ჰიგიენური ნორმების დაცვის გრდა, აქ მომხმარებლებს ერთჯერადი ინდივიდუალური მენიუ დახვდებათ. ერთ მაგიდასთან დასხდომა მხოლოდ 6 სტუმრისთვისაა შესაძლებელი. გამონაკლისი დაიშვება მათზე, ვისაც ერთი არასრულწლოვანი თანმხლები ეყოლება.
რეგულაციის მოხსნა შეეხო ე.წ. ხოფის ბაზრობასაც, თუმცა დღეს სავაჭრო ცენტრი მომხმარებლისთვის მაინც დაკეტილია. ტრადიციულად, ყოველი თვის პირველი ორშაბათი უქმეა.