09, ივნისი 2020 17:20:00
შეიძლება თუ არა ჩაითვალოს საფრთხედ ზღვაზე ბანაობა კორონავირუსის გავრცელების თვალსაზრისით? მაშინ, როცა ჯანდაცვის სისტემა ზაფხულში დასვენების მსურველთათვის და საპლაჟო სექტორისთვის რეკომენდაციაბზე ფიქრობს, პლაჟზე უკვე ხალხი მრავლადაა და მათი რიცხვი დღითიდღე იმატებს, იმის მიუხედავად, რომ ტურისტული სეზონი ოფიციალურად ჯერ კიდევ არ გახსნილა. ადამიანები ზღვაში ბანაობენ და პირბადეების გარეშე ირუჯებიან. შეიძლება ეს ღიმილის მომგვრელიც იყოს, მაგრამ ჯერ ჯერობით სანაპიროზე არც დისტანციის დაცვა კონტროლდება.
მიუხედავად იმისა, რომ ტურისტული სეზონი ოფიციალურად ჯერ არ გახსნილა, ზღვაზე უკვე ხალხმრავლობაა. მოქალაქეები ფიქრობენ, რომ ბანაობა საფრთხის შემცველი არ არის, თუმცა სოციალური დისტანციის დაცვა მაინც აუცილებელია.
ინფექციონისტის მოსაზრებით, შავი ზღვის წყალი მარილისა და გოგირდის შემცველობის მაღალი მაჩვენებლით გამოირჩევა, რაც ვირუსისთვის ანტისეპტიკურია. შესაბამისად, იგი ინფექციის გამავრცელებელი არ იქნება, თუმცა დავით მურვანიძე განმარტავს, რომ საფრთხის შემცველია ის საკვები პროდუქტი, რომელიც პლაჟზე იყიდება.
ზღვის წყალი, რომ ინფექციის გამავრცელებელი არ არის, გვარწმუნებენ საზოგადოებრივი ჯანდაცვის ცენტრშიც. ხელმძღვანელი, რუსუდან შავიშვილი მოგიწოდებთ, მაქსიმალურად დაიცვათ ჰიგიენური ნორმები და მოერიდოთ პლაჟზე საკვების მიღებას.
არის თუ არა ზღვაზე ბანაობა ვირუსის გავრცელების წყარო? უტყუარი პასუხის დასადგენად, სპეციალისტები კვლევის ჩატარების აუცილებლობაზე საუბრობენ.