პაციენტის ახლობელმა ექიმს სცემა. ხმაური და სიტყვიერი დაპირისპირება აჭარის სამედიცინო დაწესებულებაში, ინფიცირებულთან მნახველის არ შეშვებამ გამოიწვია. ძალადობაში ბრალდებული უკვე დააკავეს. ამავე კლინიკაში მყოფი პაციენტები მედ-პერსონალს უყურადღებობაში ადანაშაულებენ. საუბრობენ არასათანადო მოპყრობაზე. ქაოსი იყო გუშინ, ქობულეთის სამედიცინო ცენტრშიც. პაციენტები ამ შემთხვევაშიც ექიმებს დაუპირისპირდნენ.
ბათუმის რესპუბლიკურ საავადმყოფოში მომხდარი ინცინდენტის მონაწილე, დღეს ძალადობის ბრალდებით დააკავეს. ბრალდებულს, გამოძიება, სისხლის სამართლის კოდექსით, ექიმზე ძალადობას ედავება. დაკავებულმა ექიმს ფიზიკური შეურაცხყოფა გვიან ღამით მიაყენა. მას კოვიდინფიცირებული ახლობლის ნახვა სურდა, რისი საშუალებაც კაცს ექიმმა არ მისცა.
დავით გეგიაძესა და რესპუბლიკური საავადმყოფოს ექიმს შორის მომხდარი ინციდენტის მიუხედავად დაკავებულის ადვოკატი ამტკიცებს, რომ მისი დაცვის ქვეშ მყოფი პირი უდანაშაულოა. ბადრი ბერიძის თქმით, ქმედება არ შეიცავს სისხლის სამართლის კოდექსით გათვალისწინებულ დანაშაულს.
ეს არ იყო ექიმსა და ვიზიტორს შორის დაპირისპირების ერთადერთი შემთხვევა. ოჯახის წევრებმა ბათუმის რესპუბლიკური საავადმყოფოს პერსონალი დღეს უყურადღებობაში დაადანაშაულეს. აცხადებდნენ, რომ ასევე გვიან ღამით, ცხელებით მიყვანილ ონკოლოგიურ პაციენტს, დახმარება მხოლოდ დილით, მას შემდეგ აღმოუჩინეს, როცა კოვიდ19-ზე ტესტის პასუხი მიიღეს.
დღეს, ხმაური იყო ქობულეთის სამედიცინო ცენტრშიც. პაციენტები აქაც ექიმებს დაუპირისპირდნენ. ფიქრობენ, რომ სპეციალური მკურნალობის კურსი არ უტარდებათ. მათივე თქმით, მედ-პერსონალი შენობაში გადაადგილებისას არ იყენებს პირბადეს და რომ თერმოსკრინიგს არც გარედან შემსვლელი პირები გადიან. პაციენტები კლინიკიდან გაქცევით იმუქრებოდნენ.
სამედიცინო დაწესებულებებში არსებული ქაოსის შესახებ განმარტებების გაკეთება დღეს აჭარის მთავრობის თავჯდომარეს მოუწია. თორნიკე რიჟვაძემ ჟურნალისტების კითხვებისგან თავის არიდება სცადა, თუმცა ჩართული კამერების წინ იძულებული გახდა არსებული სიტუაცია სხვადასხვა გარემოებით აეხსნა:
აჭარაში სულ 8 კოვიდცენტრი მოქმედებს. რეგიონს 1000-ზე მეტი ინფიცირებული ჰყავს.
19
s
s
s