10, მარტი 2021 21:20:00
ბათუმში, ხშირად ნახავთ სიტუაციას, როდესაც ქალაქის რომელიმე ქუჩის ტროტუარზე ფეხით გავლა პრაქტიკულად შეუძლებელია. მიზეზი საფეხმავლო ბილიკებზე გაჩერებული ავტომობილებია. ეს მდგომარეობა ფეხით სიარულს მოუხერხებელს ხდის ყველა ადამიანისთვის, განსაკუთრებით მძიმე პრობლემებს კი შშმ პირებს უქმნის, რომლებიც სპეციალური ეტლით გადაადგილდებიან. ასევე მოქალაქეებს, რომლებიც საბავშვო ეტლით პატარებს ასეირნებენ. სიტუაცია, თანამედროვე ქალაქისთვის სრულად მიუღებელია, თუმცა უწყებები, რომლებსაც ამ პრობლემის გადაჭრა ევალებათ, წლების განმავლობაში ვითარების გამოსასწორებლად არაფერს აკეთებენ.
ამ სურათს, ბათუმის, თითქმის ყველა ქუჩაზე შეხვდებით. ავტომობილები, საპარკინგე ადგილების ნაცვლად, ტროტუარებზეა გაჩერებული. ფაქტი ყველას დაბრკოლებას უქმნის, განსაკუთრებით კი იმ პირებს, ვინც მცირეწლოვანი შვილებს საბავშვო ეტლით გადაადგილებს.
პრობლემაზე ეტლით მოსარგებლე პირებიც საუბრობენ. ამბობენ, რომ ქუჩაში თავისუფლად გადაადგილების შესაძლებლობა არ აქვთ. გიორგი გიოვანის თქმით, გადაადგილებისას მძღოლებისთვის ავტომანქანების გადაყვანა ბევრჯერ უთხოვია, თუმცა, უშედეგოდ.
ბათუმში, მცხოვრებლების თქმით, პრობლემის გამომწვევი მიზეზი საპარკინგე ადგილების სიმცირეა. მძღოლები კამერებთან საუბარს გაურბიან, პირად საუბრებში კი, თავს იმართლებენ, რომ სხვაგან გასაჩერებელ ადგილს ვერ პოულობენ.
მესამე სექტორშიც მიაჩნიათ, რომ პრობლემა საპარკინგე ადგილებს უკავშირდება. ბათუმის დემოკრატიული ჩართულობის ცენტრის კოორდინატორი პასუხისმგებლობას მერიას აკისრებს.
მიუხეადავად იმისა,რომ ყოველ მომდევნო დარღვევაზე სანქცია მზარდია, არსებული მიდგომა არაეფექტურია. მსგავსი ფაქტებს მეთვალყურეობას ბათუმის მუნიციპალური ინსპექცია უწევს.
ბათუმის, მერიაში განმარტეს, რომ პარკირების სისტემის მოწესრიგებაზე, მუშაობა მიმდინარეობს.