ნიკა მელია პატიმრობაში რჩება. თბილისის საქალაქო სასამართლომ აღკვეთის ღონისძიება - გადასინჯა, თუმცა „ერთიანი ნაციონალური მოძრაობის“ თავმჯდომარის პატიმრობაში დატოვების გადაწყვეტილება მიიღო. სხდომას თავად ბრალდებულიც ესწრებოდა. მელიამ მოსამართლეს ჩინჩალაძის მონა უწოდა, რის შედეგადაც ნინო ჩახნაშვილმა იგი სასამართლო დარბაზიდან გააძევა. მელიას ადვოკატი ამბობს, რომ თუკი აქამდე იგი პოლიტიკური პატიმარი იყო, დღევანდელი პროცესის შემდეგ ის პოლიტიკური ტყვეა.
ვიდრე მოსამართლე გადაწყვეტილებას გამოაცხადებდა, ნიკა მელიამ, მოსამართლეს ვრცელი სიტყვით მიმართა. თქვა, რომ მისი მიზანი ციხეში ჯდომა არაა, თუმცა უკანონო გირაოს გახადახდას არ აპირებს. ნიკა მელიამ თანამოაზრეებსაც მოუწოდა, მისი თავისუფლების სანაცვლოდ ხელისუფლებასთან დათმობაზე არ წავიდნენ.
დაცვის მხარე, დღეს, ორი ახალი მოწმის გამოკითხვასაც ითხოვდა. სიაში პირველი იყო პოლიციის ყოფილი თანამშრომელი, ივანე გულაშვილი, რომელმაც რამდენიმე კვირის წინ აღიარა, რომ შინაგან საქმეთა მინისტრის მოადგილემ მას 20 ივნისის კადრების წაშლა დაავალა. მეორე ვისი გამოკითხვაც სურდა, ირაკლი კობახიძეა, რომელმაც დაადასტურა, რომ ოცნება მელიას დაკავებას სასამართლო პროცესამდე რამდენიმე საათით ადრე განიხილავდა. სასამართლომ მათი დაკითხვის საჭიროება ვერ დაინახა.
ადვოკატებისთვის გაუგებარია, რატომ მოითხოვა შოთაძის უწყებამ მელიას პატიმრობაში დატოვება მაშინ, როდესაც ისინი გირაოს თანხაზე აპელირებდნენ. მელიას საქმის პროკურორი ამბობს, რომ აღკვეთი ღონისძიების შეცვლას მხოლოდ იმ შემთხვევაში მოითხოვდნენ, თუ დაცვის მხარე თანხის გადახდის მზაობას გამოთქვამდა.
მელიას ადვოკატები ამბობენ, რომ უახლოეს დღეებში სამართლებრივ კონსულტაციებს გაივლიან და ბრძოლას ისევ გაანახლებენ, თუმცა ეჭვი არ ეპარებათ, რომ მელია იქამდე იქნება ციხეში, ვიდრე "ქართული ოცნება" მისი გათავისუფლების გადაწყვეტილებას არ მიიღებს.
სასამართლოს ვერდიქტი ცნობილია - მოსამართლე ნინო ჩახნაშვილმა ადვოკატების შუამდგომლობა არ დააკმაყოფილა და ნიკა მელიას პატიმრობაში დატოვა. დღევანდელ პროცესს დღეს თავად მელიაც ესწრებოდა. პოლიტიკურად მოტივირებული გადაწყვეტილება - ასე შეაფასა მელიამ შედეგი და მოსამართლეს მონა უწოდა.
11
s
s
s