30 მილიონ ლარამდე დახარჯული თანხა და ფუნქციის გარეშე დარჩენილი ბათუმის ახალი რესპუბლიკური საავადმყოფო. სამედიცინო დაწესებულება, სულ რაღაც 1 წლის წინ გაიხსნა და უკვე სარემონტოა. ამ ვითარების გამო, რამდენიმე დღის წინ, იქ მყოფი პაციენტები, სხვა კლინიკებში გადაიყვანეს. რას უკავშირებენ შექმნილ სურათს, მმართველ გუნდსა და ოპოზიციაში? მხარეთა პოზიციებს თეო ფუტკარაძე გაგაცნობთ.
კლინიკა, რომლის მშენებლობა და რემონტი დაახლოებით ერთი წლის წინ ათობით მილიონი ლარი დაჯდა, ისევ, სარემონტოა. ბათუმის რესპუბლიკური საავადმყოფოს ახალ კორპუსში, ელექტროსადენების პრობლემაა. არსებული ვითარების გამო, შენობაში მყოფი პაციენტები, რამდენიმე დღის წინ, ბათუმის სხვადასხვა კლინიკაში გადაიყვანეს.
ბათუმის ახალი რესპუბლიკური კლინიკა 2020 წლის 16 აპრილს გაიხსნა, როგორც ცხელების ცენტრი.მშენებლობისთვის დიდი ოდენობით დახარჯული თანხის მიუხედავად, სამედიცინო დაწესებულება, სრულად არ არის აღჭურვილი. საავადმყოფო, სრულად ფუნქციონირების დაწყებამდე, უკვე რემონტს საჭიროებს. ამ გარემოებებიდან გამომდინარე, „ნაციონალურ მოძრაობაში“ კორიფციულ ნიშნებზე საუბრობენ. ლევან ანთაძის თქმით, კლინიკაში ელექტროგაყვანილობის გარდა, კიდევ, სხვა, ბევრი პრობლემაა.
კორუპციულ ნიშნებზე საუბრობენ პარტია „ლელოშიც“. აქ ამბობენ, რომ დახარჯული მილიონები, დღევანდელ რეალობას არ პასუხობს. ირაკლი კუპრაძე, აჭარის მთავრობას ადანაშაულებს. იგი სახელმწიფო აუდიტის სამსახურის მიერ, საკითხის შესწავლას აუცილებლობად მიიჩნევს, რაც, მისი თქმით ყველაფერს ნათელს მოჰფენს.
კლინიკის მუშაობის შეფერხებაში პრობლემას ვერ ხედავს, აჭარის უმაღლესი საბჭოს საბიუჯეტო კომიტეტის თავმჯდომარე. მარიკა გვიანიძე ამტკიცებს, რომ ახლად დასრულებული სამედიცინო დაწესებულება სატესტო რეჟიმზეა. მმართველი გუნდის წარმომადგენელი, ვერ აკონკრეტებს თუ რა დაჯდა საავადმყოფოს მშენებლობა, რემონტი და ინვენტარი.
ბათუმის რესპუბლიკური საავადმყოფოს განცხადებით, დღეიდან, კლინიკური საავადმყოფო სრული დატვირთვით აგრძელებს მუშაობას. დამატებით შეკითხვებზე კი, ადმინისტრაციამ, სატელევიზიო კომენტარი არ გააკეთა.
11
s
s
s