53 ნაცემი ჟურნალისტი და დაკავებული 11 პირი, რომლებმაც მედიის წარმომადგენლებზე იძალადეს. გუშინ ჰომოფობიურ აქციაზე დაზარალებულები სამართლიანობის აღდგენისთვის ბრძოლას იწყებენ. ვიდრე სამართალდამცავი უწყება თავმდამსხმელებს ეძებს, რადიკალური ჯგუფების აგრესიის მსხვეპლი მედიის წევრები საკუთარი ძალებით ცდილობენ მათ გამოვლენას. როგორ უპასუხებს მედია ღია ანგარიშსწორებას?
წაქეზებული მოძალადე ჯგუფები და სასტიკად ნაცემი ჟურნალისტები - ჰომოფობიურ აქციაზე დაზარალებული მედია სამართლიანობის აღდგენისთვის ბრძოლას იწყებს. რადიკალური ჯგუფების აგრესიის მსხვეპლნი დარწმუნებულები არიან, რომ ძალადობის მთელი ეს სერია კარგად ორგანიზებული და ნებადართული იყო.
გომელაურის უწყებამ მედიის 53 ჟურნალისტი უკვე ცნო დაზარალებულად, თუმცა ამ ეტაპზე დაკავებული მხოლოდ 11 პირია. სასამართლომ 3 დღიანი პატიმრობა შეუფარდა გუშინ დაკავებულ პაატა გურჩიანს, რომელიც ბრალს ეთანხმება თუმცა ჟურნალისტების მისამართით გინებას არ ნანობს. სასამართლომ გირაოს სანაცვლოდ გაათავისუფლა კიდევ რამდენიმე დაკავებული. მათ შორის ორი წარსულში ნასამართლევი პირია, რომლებსაც გამოძიება ჟურნალისტურ საქმიანობაში ხელის შეშლასა და ფიზიკურ ძალადობას ედავება. დაკავებულია სკუტერის მძღოლიც, რომელიც აქციაზე ჟურნალისტებისთვის მოპედის დაჯახებას ცდილობდა.
დაზარალებულ ჟურნალისტებს უფასო სამართლებრივ მომსახურებას სთავაზობს ადვოკათტა კორპუსი, რომელიც დღეს სოლიდარობის ნიშნად დიღმის სამმართველოსთან მივიდა. ადვოკატებს დღეს არ გასჭირვებიათ გუშინდელ მოვლენებისთვის სახელის დარქმევა - მათი აზრით, ეს ჟურნალისტების წინააღმდეგ მიზანმიმართული სპეცოპერაცია იყო, რადგან თავდასხმები თბილისის სხვადასხვა წერტილში ერთდროულად ხდებოდა.
ვიდრე პოლიცია ჯერ კიდევ ადგენს იმ ადამიანის სახელებს, ვინც ჟურნალისტებზე სასტიკად იძალადა, მედიამ დამოუკიდებელი ძალებით უკვე დაიწყო ვიდეომასალების გაშიფვრა და დამნაშავე პირების გამოვლენა.
ეს საზოგადოებრივი მაუწყებლის ოპერატორი, ილია თავლიაშვილია, რომელსაც რადიკალურმა ჯგუფებმა თვალებში სავარაუდოდ, ქიმიური ნივთიერება შეასხეს. ჰოსპიტალში რჩებიან ის ჟურნალისტებიც, რომლებმაც 1 არხის ოპერატორის მსგავსად ხელისუფლების მიერ წახალისებული ძალადობა საკუთარ თავზე გამოსცადეს. ოპერაცია გაუკეთდა ტვ პირველის ოპერატორსაც, რომელსაც ფიზიკური თავდასხმის დროს სახის ძვლები ჩაუმტვრიეს.
როგორი უნდა იყოს მედიის პასუხი ღია ძალადობაზე, რომელმაც ბოლო პერიოდში სისტემური ხასიათი მიიღო. მედიამენეჯერები ფიქრობენ, რომ ის, რაც გუშინ თბილისის ცენტრში მოხდა ხელისუფლების ძალადობრივი და დანაშაულებრივი კამპანიის შედეგია.
ჟურნალისტებმა, პოლიციას მომხდარი დეტალებში უკვე უამბეს. ჯერი ახლა სამართალდამცავ უწყებაზეა, რომელმაც დამნაშავეები უნდა გამოავლინოს და კანონის სრული სიმაკცრით დასაჯოს.
1
s
s
s