19, აგვისტო 2021 09:50:00
საქართველოს პატრიარქი ფერისცვალების დღესასწაულთან დაკავშირებით მიმართვას ავრცელებს. ილია II მღვდელმთავრებსა და მონასტრების წინამძღვრებს მოუწოდებს ჯანმრთელობის პარაკლისები გადაიხადონ:
"ეს უდიდესი ზეიმი განსაკუთრებით მინდა მივულოცო პანდემიის გამო უძლურებაში მყოფ ჩვენს დებსა და ძმებს და, საერთოდ, ჯანმრთელობასთან დაკავშირებული პრობლემების მქონე ჩვენს სულიერ შვილებს. არ შეგეშინდეთ, არ დაბრკოლდეთ, ღმერთის იმედი გქონდეთ და, პირველ რიგში, დახმარება მას სთხოვეთ.
ამასთან, ჩვენს მღვდელმთავრებსა და ეკლესია-მონასტრების წინამძღვრებს ვაძლევ კურთხევას, ყოველი დიდი დღესასწაულის და ყოველი კვირის წირვის შემდეგ კოვიდით და სხვა სნეულებით დაავადებულთათვის გადაიხადონ საჯანმრთელო პარაკლისი და უფალს და ყოვლადწმინდა ღვთისმშობელს შეავედრონ უძლურებაში მყოფი ჩვენი სულიერი შვილები", - წერია პატრიარქის მიმართვაში.
შეგახსენებთ, დღეს, მართლმადიდებელი ეკლესია მაცხოვრის ფერისცვალებას აღნიშნავს.