მიხეილ სააკაშვილის ადვოკატი, ბექა ბასილაია ამბობს, რომ საქართველოს მესამე პრეზიდენტი მზად არის ნარკოტესტირებისთვის, რომელსაც ის პირდაპირ ეთერში ჩააბარებს. მისი თქმით, იგივე ღარიბაშვილმაც უნდა გააკეთოს. ამის შესახებ მან დღეს მედიასთან ისაუბრა.
"არ აყვეთ ღარიბაშვილის ამ ენაჭარტალა მონაჭორებს. ჩვენ გვაქვს ასეთი შეთავაზება. წლების განმავლობაში დაკავებამდე ჩვენ გვინახავს მიხეილ სააკაშვილი ველოსიპედზე, გვინახავს ცურვისას, გვინახავს თხილამურებზე, ის უაღრესად ჯანსაღი ცხოვრების წესით ცხოვრობდა, დარბოდა ვარჯიშობდა და ა.შ. აი, ჩვენ მზად ვართ ტელეკამერების თანდასწრებით, არა ვენაში, არა სამხარაულის კლინიკაში, ამ დაწესებულებაში ჩავაბაროთ ნებისმიერი ნარკოტესტი, დაწყებული მსუბუქი ნარკოტიკიდან, დამთავრებული ქიმიური ნარკოტიკებით. ამავდროულად, ღარიბაშვილთან გვექნება "ჩელენჯი" მან კანცელარიაში, მისთვის მისაღები მედიების თანდასწრებით თუნდაც ჩააბაროს ტესტი" - განაცხადა ბექა ბასილაიამ.
ადვოკატი, დღეს რუსთავის მე-5 პენიტენციურ განყოფილებასთან იმყოფებოდა, იქ, სადაც მიხეილ სააკაშვილი 1-ელ ოქტომბრიდან სასჯელს იხდის.
ცნობისთვის, დღეს საქართველოს პრემიერ-მინისტრმა, ირაკლი ღარიბაშვილმა, მიხეილ სააკაშვილზე გაავრცელა წერილი, სადაც ექს-პრეზიდენტის ნარკოდმოკიდებულებაზეც ისაუბრა.
1
s
s
s