25, ოქტომბერი 2021 20:01:00
ეს მოკლე ტექსტური შეტყობინება, ბათუმის მერიის მუნიციპალური სერვისების სააგენტოს პასუხია, უხვი ნალექით დაზარალებული მოქალაქეების დახმარებაზე მსგავსი შინაარსის განცხადება, ერთი თვის წინაც მოვისმინეთ. დაზარალებული მოქალაქეები ხელისუფლებამ უკვე მესამედ მოატყუა. მათ ჯერ, არც კომპენსაციები მიუღიათ და აღარც მერიის წამომადგენლები უნახავთ.
სანამ მერია დახმარებას აჭიანურებს, მოქალაქეები ცუდ დღეში არიან. მაგალითად, შავშეთის ქუჩაზე მცხოვრები, დარიკო კახიძის ცხოვრება 22 სექტემბრის შემდეგ რადიკალურად შეიცვალა. მაშინ, როდესაც ბათუმი ვენეციას დაემსგავსა, კახიძეების საცხოვრებელი სახლი და საყოფაცხოვრებო ტექნიკა სრულად განადგურდა.
კახიძეების მსგავსად, მერიისგან დაპირებული კომპენსაციის მიღებას, დავითაძეებიც ელოდებიან. როგორც გვიყვებიან, ბათუმის მერიაში ეუბნებიან, რომ ბიუჯეტში ჯერ-ჯერობით საკმარისი თანხა არაა.
უხვმა ნალექმა, ერთი თვის წინ, ბათუმში, 500-ზე მეტი მოქალაქე დააზარალა. ბუნებრივია, ყველა მათგანის პრობლემებზე ვერ გიამბობთ, თუმცა, აღმოჩნდა, რომ მერიას კომპენსაცია არცერთ მათგანზე გაუცია.
ბნელი 90-იანები - ასე აფასებენ „ერთიან ნაციონალურ მოძრაობაში“, ყოველი გაწვიმების შემდეგ, ბათუმში შექმნილ ვითარებას. რეზო ხარაზი ამბობს, რომ „ქართულმა ოცნებამ“, ინფრასტრუქტურის მოსაწესრიგებლად გამოყოფილი თანხა მოიპარა. ოპონენტის თქმით, ხელისუფლების დაუდევრობით, დაზარალებული მოქალაქეები კომპენსაციის გარეშე დარჩნენ.
მაშინ, როდესაც „ქართული ოცნება“ წინასაარჩევნო კამპანიაში აქტიურადაა ჩართული და მოქალაქეებს დაპირებების გრძელი და მაცდური სიებით ხვდებიან, ბათუმი ყოველი გაწვიმების შემდეგ იტბორება. თორნიკე რიჟვაძეს დაპირებული, კუნძულის შესაქმნელად ძალისხმევაც კი არ დასჭირდა. ყოველი გაწვიმენისას, ზღვისპირა ქალაქი, კუნძულს მართლა ემსგავსება. მოქალაქეები, კი გაუმართავი სანიაღვრე არხების გამო, კვლავ დახმარების გაწევის გარეშე, ბედის ანაბარა რჩებიან.