04, თებერვალი 2017 11:19:00
სკოლის ადმინისტრაცია, პედაგოგები და მოსწავლეების მშობლები საქართველოს განათლების ხარისხის განვითარების ეროვნული ცენტრის გადაწყვეტილებას არ ეთანხმებიან, რომლის მიხედვითაც, შაჰინის სახელობის სკოლა-ლიცეუმს ავტორიზაცია გაუუქმდა.
გეგმური მონიტორინგის შედეგად, როგორც განათლების ხარისხის განვითარების ეროვნულ ცენტრში აცხადებენ, სკოლას ბავშვების ჩარიცხვასთან დაკავშირებით სერიოზული დარღვევები აღმოაჩნდა. დაწესებულებაში დღეისათვის 340 მოსწავლე ირიცხება, მათგან 17 უცხო ქვეყნის მოქალაქეა.
ირკვევა, რომ სკოლის ადმინისტრაციამ 10 არაქართველი მოსწავლე სხვა ჯგუფში გადაიყვანა, რომლებიც ამ ეტაპზე ქართულ სექტორში განათლებას ქართულად ეუფლებიან. ფაქტს კი ელგუჯა დავითაძე იმით ხსნის, რომ ეს იყო ავტორიზაციის საბჭოს მოთხოვნა, რის საფუძველზეც დაწესებულებაში თურქული სექტორი უნდა გაუქმებულიყო. გადაწყვეტილებაში სკოლის დირექტორი პოლიტიკურ მოტივს ხედავს.
შაჰინის სახელობის სკოლა-ლიცეუმის საქმიანობა კითხვებს უჩენს აჭარის, განათლების, კულტურისა და სპორტის მინისტრს, თუმცა ინგა შამილიშვილი კონკრეტიკისგან თავს იკავებს. სამინისტრომ იმ სკოლების შერჩევა უკვე დაიწყო, სადაც მოსწავლეების გადანაწილება მოხდება.
შაჰინის სახელობის სკოლა-ლიცეუმში დაფიქსირებული დარღვევების შესახებს დასკვნა 10 დღეში გახდება ცნობილი, რის შემდეგაც სავარაუდოდ, დაწესებულება დაიხურება. საქართველოს განათლების ხარისხის განვითარების ეროვნული ცენტრში განმარტეს, რომ კანონმდებლობით, სკოლას აღარ აქვს ფუნქციონირების უფლება.
შაჰინის სახელობის სკოლა-ლიცეუმის ადმინისტრაცია დავას სამართლებრივი გზით აპირებს. შეგახსენებთ, რომ თურქეთის გენერალურმა კონსულმა ბათუში რამდენიმე თვის წინ სკანდალური განცხადება გააკეთა. იასინ თემისქანი ამბობდა, რომ აღნიშნულ კერძო სკოლაში ტერორისტებს ზრდიან. ჩვენს სატელეფონო ზარებს საკონსულოში დღეს არ უპასუხეს.