აქციებისა და დაპირისპირებების ფონზე არჩეული პრეზიდენტი უფლებამოსილების შესრულებას შეუდგა. პირველი სამუშაო დღეს ათონელის რეზიდენციაში დაიწყო.  ზურაბიშვილი  თავს ბედნიერად იმ   შენობაში გრძნობს,  რომლის რეკონსტრუქციაზე  26 მილიონი დაიხარჯა.

 

ქვეყნის მეხუთე პრეზიდენტს რეზიდენციაში ლაშა ჟვანია და დიმიტრი გაბუნია დახვდნენ. სწორედ ჟვანია დანიშნა სალომე ზურაბიშვილმა ადმინისტრაციის უფროსად, ხოლო საპარლამენტო მდივანი დიმიტრი გაბუნია იქნება. პრესასთან ურთიერთობას ნათია პავლიაშვილი გააგრძელებს, თუმცა ზურაბიშვილის განცხადებით, პიარის ჯგუფი კიდევ გაძლიერდება. 

 

სალომე ზურაბშვილმა ჟურნალისტებსაც მიმართა და განაცხადა, რომ  ათონელის რეზიდენცია მათი სახლი იქნება. ამბობს, რომ ადმინისტრაციაში მედია კლუბიც შეიქმნება. იგი პრესასთან განსხვავებული ფორმატით ურთიერთობასაც აპირებს.

 

პრეზიდენტმა განცხადებები საკუთარი კაბინეტიდან გააკეთა, რომელიც სამუშაოდ უკვე მზადყოფნაშია, რეზიდენციის ნაწილში კი ისევ რემონტი მიმდინარეობს.

 

ადმინისტრაციული ნაწილისთვის განკუთვნილი ივენტარი აქ ავლაბრის რეზიდენციიდან გადმოაქვთ. პრეზიდენტის ადმინისტრაციის ხელმძღვანელი კი უკვე პირველ შეხვედრებსაც იწყებს. ლაშა ჟვანია გიორგი მარგველაშვილის ადმინისტრაციის თანამშრომლებს შეხვდება და ჯერ მათ კვალიფიკაციას გაეცნობა. 

 

რა ბედი ელით გიორგი მარგველაშვილის ადმინისტრაციის თანამშრომლებს, რომელთა რაოდენობაც კანონის მოთხოვნით უნდა შემცირდეს. ლაშა ჟვანიას თქმით, ახალ პრეზიდენტთან მუშაობის გაგრძელების შეთავაზება უკვე მიიღეს კობა ედილაშვილმა, რომელიც ადმინისტაციის უფროსის მოადგილე იქნება და ასევე  საფინანსო სამსახურის ხელმძღვანელმა თამარ გოდერძიშვილმა. ზურაბიშვილის ადმინისტრაციაში მუშაობას გააგრძელებს მარგველაშვილის საზოგადოებასთან ურთიერთობის სამსახურის ხელმძღვანელი, სოფო ჯაჯანაშვილიც. 

 

2019 წლის ბიუჯეტის თანახმად, პრეზიდენტის ადმინისტრაციის დაფინანსება 2018 წელთან შედარებით 3,8 მილიონი ლარით მცირდება და 6 მლნ ლარი იქნება. 140-დან 60 ადამიანამდე შემცირდება პრეზიდენტის ადმინისტრაციაში მომუშავეთა რაოდენობაც. ასევე არსებული ფორმით უქმდება პრეზიდენტის სარეზერვო ფონდიც, რომლის დაფინანსებაც მარგველაშვილის პრეზიდენტობის პერიოდში 5 მილიონი ლარი იყო.