25, დეკემბერი 2018 20:02:00
უკვე მე-11 დღეა გამსახურდიები შიმშილობენ. პირველი პრეზიდენტის შვილები მამის გარდაცვალების საქმის გამოძიებას ითხოვენ. შეიძლება ითქვას, რომ პროტესტის უკიდურესმა ფორმამ შედეგი გამოიღო. რა შედეგი?
საქართველოს პირველი პრეზიდენტის, ზვიად გამსახურდიას შვილი, კონსტანტინე გამსახურდია, რომელიც ძმასთან ერთად პროკურატურის შენობაში მე-11 დღეა შიმშილობს, ალადაშვილის სახელობის კლინიკაში გადაიყვანეს. შიმშილობის ფონზე მას თავბრუსხვევა აღენიშნებოდა და ახლა კარდიოლოგიურ განყოფილებაშია მოთავსებული. ექიმის რეკომენდაციით, კონსტანტინე გამსახურდიასთვის შიმშილობის გაგრძელება არასასურველია.
გამსახურდიების პროტესტის უკიდურესი ფორმის შემდეგ, პირველი პრეზიდენტის გარდაცვალების საქმის ხანდაზმულობის ვადის გაგრძელების გამო სისხლის სამართლის კოდექსში ცვლილებები შევა. კანონში ცვლილების თანახმად სისხლის სამართლის საქმეებზე ხანდაზმულობის ვადა 5 წლით გახანგრძლივდება
საქართველოს პირველი პრეზიდენტის ოჯახის ადვოკატი კი გამსახურდიას მკვლელობის საქმეზე სპეციალური საგამოძიებო ჯგუფის შექმნას მოითხოვს. ამირან გიგუაშვილი ამბობს, რომ საქმის გამოძიებას ოჯახის ნდობით აღჭურვილი პირი უნდა გაუძღვეს.
შეგახსენებთ, საქართველოს პირველი პრეზიდენტი ზვიად გამსახურდია 1993 წლის 31 დეკემბერს, გამთენიისას, სამეგრელოს სოფელ ხიბულაში გაურკვეველ ვითარებაში გარდაიცვალა.