23, მარტი 2017 20:42:00
ყოროლისწყლის სათავე ნაგებობის რეაბილიტაციისათვის რუსული კომპანია მილიონნახევარზე მეტ ლარს მიიღებს. მტირალა-ყოროლისთავის წყალსადენის მოწყობის მეორე ეტაპის ფარგლებში, ინფრასტრუქტურულ სამუშაოებთან დაკავშირებით, გამოცხადებულ ტენდერში რუსულმა კომპანია „კლასიკ სტროი“-მა გაიმარჯვა და სამუშაოებს უახლოეს ხანებში დაიწყებს. პროექტის ღირებულება მილიონ 600 ათასი ლარს შეადგენს და წყალსადენზე მაგისტრალის მოწყობას ითვალისწინებს. ხელვაჩაურის მუნიციპალიტეტის დღევანდელ სხდომაზე ამ პროექტს მხარი არ დაუჭირა „ნაციონალურმა მოძრაობამ“, რომლის წევრებმა სხდომათა დარბაზი პროტესტის ნიშნად დატოვეს. მიშა ბოლქვაძის თქმით, ხელვაჩაურის გამგეობამ საჩუქარი ოკუპანტი ქვეყნის კომპანიას გაუკეთა, რომელიც მოსკოვშია რეგისტრირებული. აღნიშნავს იმასაც, რომ ტენდერში მონაწილე სხვა კომპანიებს პრეტენზიები და საჩივრები აქვთ. თუმცა გამგეობა მათ უგულველყოფს. ოპოზიციის განცახდებას ხელვაჩაურის გამგეობისა და საკრებულოს სხვა წევრებმა პოპულისტური უწოდეს. მათი თქმით, ტენდერში მონაწილე 5 კომპანიას შორის სატენდერო პირობები მხოლოდ რუსულმა „კლასიკ სტროილ“ -მა დააკმაყოფილა. მიუხედავად იმისა, რომ ელექტრონულ ტენდერთან დაკავშირებით რამდენიმე კომპანიას საჩივარი აქვს დაწერილი, დღეს კომენტარის გაკეთებისაგან თავი შეიკავეს.