19, აპრილი 2017 20:07:00
28 წლის შემდეგ, ხულოში, სოფელ წაბლანაში სტიქიის შედეგად დაზარალებულებს მთავრობა ბინებს გადასცემს. ამის შესახებ გიორგი კვირიკაშვილმა წაბლანაში დაღუპულთა პატივის მიგების შემდეგ განაცხადა. პრემიერ მინისტრის განცხადებით, მთავრობა მაქსიმალურად ცდილობს, წლების განმავლობაში გადაუწყვეტელი პრობლემა გადაწყვიტოს და სტიქიის შედეგად დაზარალებულებს საკუთარი ჭერი ჰქონდეთ. გიორგი კვირიკაშვილის განცხადებით, უკვე გამოყოფილია შესაბამისი დაფინანსება, ასევე, სახელმწიფოსთან ერთად, პროცესში ჩართულია ინვესტორი კომპანია "აჭარისწყალი" და შენდება საცხოვრებელი, რომელშიც ტრაგედიის შედეგად უსახლკაროდ დარჩენილები თავშესაფარს მიიღებენ. გიორგი კვირიკაშვილმა ჰესების მშენებლობის შედეგად დაზიანებულ გზებზეც ისაუბრა და აღნიშნა, რომ აუცილებლად მოწესრიგდება და იქნება ევროპული სტანდარტის სამთო გზის შესაბამისი. ასევე აშენდება ხულო-ზარზმის, ხულო-ბეშუმის გზაც.