20, აპრილი 2017 20:06:00
ბათუმის მეექვსე საბავშო ბაღში 2015 წელს გათავისუფლებული პედაგოგი ნათია ცინცაძე დაბრუნდა. ბაღების გაერთიანებამ ყოფილი თანამშრომელი ბათუმის საქალაქო სასამართლოს დადგენილების საფუძველზე აღადგინა. როგორც უწყების იურისტი ამბობს, რამდენიმე დღეში მოსამართლე ინდირა მაშანეიშვილის გადაწყვეტილების ქუთაისის სააპელაციო სასამართლოში გასაჩივრებას გეგმავენ. ნათია ცინცაძე 2 წლის წინ ბაღში მომხდარი შემთხვევის გამო გაათავისუფლეს. ძიძამ აღსაზრდელს სიტყვიერი შეურაცხყოფა მიაყენა, პედაგოგმა კი იგი მობილური ტელეფონით გადაიღო და რამდენიმე პირს აჩვენა, რაც ბაღების გაერთიანებამ ფაქტის გასაჯაროვებად მიიჩნია და ნათია ცინცაძე გაათავისფლა. შემთხვევის შემდეგ ძიძამ კი სამსახური საკუთარი განცხადების საფუძველზე დატოვა. ცინცაძემ საკუთარი უფლებების აღსადგენად სასამართლოს მიმართა. მიმდინარე წლის მარტში ბათუმის საქალაქო სასამართლომ ბაღების გაერთიანებას ნათია ცინცაძის სამსახურში აღდგენა დაავალა.