20, იანვარი 2017 08:22:00
სოფელ ქვედა თხილვანაში მეწყერსაშიშ ზონაში მცხოვრებ მოსახლეობასთან მიმდინარე მოლაპარაკებებში მთავრობის თავმჯდომარე პირადად აპირებს ჩართვას - განცხადება ზურაბ პატარაძემ დღეს გააკეთა. მოსახლეობასთან კონსულტაციები მეოთხე დღეა მიმდინარეობს, თუმცა შეთანხმება ამ დრომდე ვერ შედგა. დაზარალებულებთან მოლაპარაკებას ჯანდაცვის მინისტრის მოადგილე რამაზ ჯინჭარაძე აგრძელებს. როგორც ადგილობრივები აცხადებენ მთავრობის შეთავაზებები მათთვის მიუღებელია და სტიქიის ზონაში მორიგეობას აგრძელებენ. რამაზ ჯინჭარაძის განცხადებით, 30-მდე ოჯახის მდგომარეობა უკვე შესწავლილია, მათგან შეთავაზებას მხოლოდ ხუთი ოჯახი იღებს. ხელისუფლება მათ ქირით გაყვანას და საცხოვრებელი სახლის შესაძენად 25 ათას ლარს სთავაზობს. თხილვანაში საფრთხე 62 ოჯახს ემუქრება. მეწყერი 10 იანვარს გააქტიურდა. ჩამოწოლილმა მიწის მასამ მდინარის კალაპოტი ჩაკეტა. გეოლოგების დასკვნით 62-ივე ოჯახი განსახლებას საჭიროებს.