29, ოქტომბერი 2020 20:00:00
პარტიები გამარჯვების მოლოდინში არიან, ბრძოლის ველზე კი უპირატესობის მოპოვების შანსი ყველა მათგანისთვის განსხვავებულია. ვინ შემქნის პოლიტიკურ ამინდს პარლამენტში? პოლიტიკოსების პროგნოზები თეო ფუტკარაძემ მოისმინა.
წინასაარჩევნოდ, პოლიტიკური დაძაბულობა, კულმინაციას აღწევს. სუბიექტები, საუკეთესო შედეგების მოსაპოვებლად ძალ-ღონეს არ იშურებენ. კანდიდატები ერთმანეთს ეპაექრებიან საჯაროდ, იყენებენ მედიას, სოციალურ ქსელს, მათ შორის ცრუ გვერდებს, ყველა რესურსს, რომელიც ამომრჩევლის თავიანთ უპირატესობაში დასარწმუნებლად, ან უბრალოდ გადაბირებაში დაეხმარება. წინასწარი განწყობებიც ისეთი აქვთ, როგორ პროგნოზზეც მუდმივად გვესაუბრებიან. კიდევ ერთხელ, მორიგი საარჩევნო ვადით მოსვლაში, ეჭვი, არც მმართველ გუნდს ეპარება. დამარხცხებას "ქართულ ოცნებაში" ფაქტიურად გამორიცხავენ.
სხვადასხვა ორგანიზაციის მიერ, წინასაარჩევნო გარემოს კვლევისას, ანგარიშებში ვკითხულობთ, რომ განსაკუთრებით ბოლო ერთ თვეში, ხელისუფლება აქტიურად ეწევა ოპოზიციის დაშინებას, ამომრჩევლის მოსყიდვას, მათზე ზეწოლას და სხვა. მიუხედავად ამისა, ხელისუფლების ოპონენტები ღრმად არიან დარწმუნებულები, რომ 31 ოქტომბრის კენჭისყრა ოცნების სასარგებლოდ არ დასრულდება, რადგან მათ ხელთ არსებული რესურსის მიუხედავად, ხალხი ხელისუფლების ცვლილებებისთვის მზადაა.
გამარჯვების გარდა, სხვა ალტერნატივას არ განიხილავენ პარტიაში - ,,ლელო საქართველოსთვის”. ბათუმის მაჟორიტარობის კანდიდატს, კონკურენციის შიში არ აქვს. ამბობს, რომ მათი ძალა კარგად დაინახა მათ შორის "TV 25"-ს დებატში, როცა ეთერში ფაქტიურად მოწინააღმდეგეების გარეშე იჯდა. თუ მოლოდინი მაინც არ გაუმართლდა, ირაკლი კუპრაძე ამბობს, რომ ბრძოლას არც თავად დანებდება და არც პარტია.
წარმატებაში დარწმუნებულია "ევროპული საქართველოც. არმაზ ახვლედიანი, რომელიც პარლამნეტისთვის ბათუმის სახელით იბრძვის, ამბობს, რომ შესაძლოა პარტიამ სრული უმრავლესობა ვერ აიღოს, თუმცა საკუთარ მაჟორიტარულ ოლქში "ქართულ ოცნებას" მანდატს მაინც წაართმევს.
რა იქნება შემდეგი ნაბიჯი, თუ კი პროგნოზები არ გაუმართლდებათ, ამგვარ შედეგს არ განიხილავენ პარტიაში - "სტრატეგია აღმაშენებელი", შესაბამისად, არ აქვთ პასუხი, როგორი იქნება პარტიის შემდგომი ნაბიჯები პოლიტიკაში.
ვის გაუმართლდება და ვის არა პროგნოზი, გარდა გაკეთებული არჩევანისა, ეს საარჩევნო პროცესის გამჭვირვალობაზე და იმაზე იქნება დამოკიდებული, რამდენად მივა კენჭისყრის დღეს ამომრჩეველი და საკუთარი არჩევანით საარჩევნო ყუთთან.