ბიძინა ივანიშვილის ხელისუფლება ჟურნალისტებს უსმენს. დღეს ეს „ქართულმა ოცნებამ“ ღიად დააფიქსირა. საუბარია ტვ პირველისა და ერთიანი ნაციონალური მოძრაობის წევრის სატელეფონო კომუნიკაციაზე, რომლის დეტალები მმართველმა გუნდმა სპეციალურად გამართულ ბრიფინგზე გაასაჯაროვა. როგორ ფასდება რეპორტიორის უკანონოდ მოსმენის ფაქტი?
ბიძინა ივანიშვილის ხელისუფლება, რომ ჟურნალისტებს ფარულად უსმენს ეს დღეს, ღიად ირაკლი კობახიძემ დაადასტურა. „ქართული ოცნების“ პოლიტიკურმა მდივანმა რეპორტიორსა და ნაციონალური მოძრაობის წარმომადგენელს შორის შემდგარი კომუნიკაციის დეტალები ბრიფინგზე გაასაჯაროვა. კობახიძის თქმით, TV პირველის რეპორტიორმა ნატო გოგელიამ ბესო ქათამაძეს მოსთხოვა ინფორმაცია იმ უბნების შესახებ, სადაც „აპირებენ ხმაურსა და არეულობას“, რაზედაც ჟურნალისტმა კონკრეტული ინფორმაცია მიიღო.
ნატო გოგელია სასამართლოსთვის მიმართვას აპირებს და მისი ინტერესების დაცვას ამ გზით შეეცდება. ამბობს, რომ კობახიძეს პირადი ინფორმაციის გასაჯაროებისთვის პასუხისგება მოუწევს. ჟურნალისტი ხელისუფლებას ფარულ მოსმენაში ადანაშაულებს.
რეპორტიორთა უკანონო მოსმენის ფაქტი მაუწყებელთა ალიანსის პროგრამების დირექტორმა ნეგატიურად შეაფასა. ნათია კუპრაშვილი გამოძიების დაწყების აუცილებლობაზე ამახვილებს ყურადღებას.
დაძაბული წინასაარჩევნო გარემოს პარალელურად ჟურნალიდტებზე თავდასხვა სხვადასხვა ფორმით ისევ გრძელდება. დღეს, "მთავარი არხის" იმერეთის ბიუროს კორესპონდენტს ირაკლი ვაჩბერაძესა და გადამღებ ჯგუფს კუთვნილი ტექნიკა გასტაცეს. ჟურნალისტის თქმით, აპარატურა ორმა ადამიანმა მოიპარა. ინციდენტი იმ დროს მოხდა, როდესაც ვაჩიბერაძე პირდაპირ ეთერში ჩასართავად ემზადებოდა. რეპორტიორი მასალას ვანში არჩევნების შესაძლო გაყალბების სქემაზე ამზადებდა.
ჟურნალისტური ეთიკის ქარტია გმობს მოქალაქეების და მათ შორის რეპორტიორთა უკანონო მოსმენებისა და თვალთვალის პრაქტიკას. როგორც განცხადებაშია აღნიშნული, ეს ეწინააღმდეგება საზოგადოებრივი დემოკრატიული განვითარების პრინციპებსა და ლიბერალურ ღირებულებებს. ასევე მიუღებელია, როდესაც უკანონო სატელფონო მოსმენების შინაარსს ასაჯაროებენ მაღალი თანამდებობის პირები. ქარტია მოუწოდებს შესაბამის უწყებებს, დროულად მოახდინონ სათანადო რეაგირება სატელეფონო ჩანაწერების უკანონო მოპოვებისა და გამოყენების ფაქტზე.
1
s
s
s