27, იანვარი 2021 21:59:00
არაერთგვაროვანი მიდგომით განხორციელებული შესყიდვები, ხარვეზებით შესრულებული ინფრასტრუქტურული სამუშაოები, არასრულყოფილად მომუშავე შიდა აუდიტის სამსახური - ეს არასრული ჩამონათვალია იმ ნაკლოვანებებისა, რომელიც სახელმწიფო აუდიტის სამსახურმა ქედის მუნიციპალიტეტის საქმიანობის შესწავლისას აღმოაჩინა. მონიტორინგი 2018-2019 წლების პერიოდს მოიცავს. აუდიტი, მუნიციპალიტეტის მერიას მოუწოდებს, შეიმუშაოს კონტროლის ისეთი მექანიზმები, რაც არსებული პრობლემების დროულ აღმოფხვრას უზრუნველყოფს.
ფარული სამუშაოს დადასტურების გარეშე, ხარვეზით შესრულებული სამუშაოებისთვის ანაზღაურებული თანხები - ეს ერთ-ერთი ნაკლოვანებაა, რაზეც სახელმწიფო აუდიტი წერს. ასკვნის, რომ ქედის მუნიციპალიტეტში არსებულმა კონტროლის სისტემამ, ვერ უზრუნველყო არასრულფასოვნად შესრულებული სამუშაოების გამოვლენა და აღმოფხვრა. აუდიტი იმ რისკებზეც წერს, რასაც არამართლზომიერი ქმედებები წარმოშობს.
სახელმწიფო აუდიტმა, ხარვეზები გამოავლინა გარე განათების მოწყობისთვის შესყიდულ სამუშაოებშიც. დაადგინა, რომ ტენდერში გამარჯვებულ კომპანიას 56 ათას 37 ლარი ისე გადაუხადა, რომ არც ფარული სამუშაოს აქტები მოუთხოვია და არც განათების ბოძებზე საჰაერო კაბელის მონტაჟის პროექტთან შესაბამისობა გადაუმოწმებია. აუდიტი მერიას აძლევას რეკომენდაციას:
კიდევ ერთი საკითხი, რაზეც სახელმწიფო აუდიტის სამსახური წერს, არაერთგვაროვანი მიდგომით განხორციელებული შესყიდვებია. მაგალითისთვის, მდინარე აჭარისწყალზე საავტომობილო ხიდის მშენებლობის ტენდერია მოყვანილი. აუდიტი განმარტავს, რომ კომისიამ ტენდერში გამარჯვებულად ისეთი კომპანია გამოაცხადა, რომელსაც სამუშაოების განხორციელებისთვის შესაბამისი გამოცდილება არ ჰქონდა.
აუდიტი მუნიციპალიტეტის საკრებულოს წევრების ანაზღაურებაში არსებულ ხარვეზებზეც საუბრობს. დასკვნის მიხედვით, არათანამდებობის პირებს ეძლევათ არა ფიქსირებული გასამრჯელო, არამედ უნაზღაურდებათ უფლებამოსილების განხორციელებასთან დაკავშირებული ხარჯები. აუდიტი აღნიშნავს, რომ საკრებულოს წევრებზე მაქსიმალური თანხებია ანაზღაურებული, რაც დაუსაბუთებლად თანხების გაცემაზე მიანიშნებს, რადგან შეუძლებელია საკრებულოს ყველა წევრს ჰქონდეს ერთი და იგივე შესასრულებელი დავალება და იდენტური ხარჯი.
სახელმწიფო აუდიტი ქედის მერიის შიდა აუდიტის მუშაობასაც აფასებს. წერს, რომ სამსახურის საქმიანობა სრულყოფილად ვერ უზრუნველყოფს მერიის ფინანსების მართვის გაუმჯობესებას. ასევე, მუნიციპალიტეტის ინფრასტრუქტურული ღონისძიებების შესრულების მონიტორინგის, საბიუჯეტო სახსრების ხარჯვის მიზნობრიობის და ეფექტიანობის გაზრდის ხელშეწყობას.