28, იანვარი 2021 21:59:00
„კორუფციის აღქმის ინდექსში“ მსოფლიოს 180 ქვეყანას შორის, საქართველოს 45-ე ადგილი უჭირავს. ამის შესახებ „საერთაშორისო გამჭვირვალობის“ სამდივნოს მიერ გამოქვეყნებულ კვლევაშია საუბარი. აღნიშნულის მიხედვით, საქართველოს 56 ქულა აქვს. რეიტინგში 100 ქულა კორუფციის აღქმის ყველაზე დაბალ, ხოლო 0 ქულა - ყველაზე მაღალ დონეს აღნიშნავს. მაჩვენებელს ქვეყანა რამდენიმე წელია უცვლელად ინარჩუნებს. არასამთავრობო ორგანიზაციის შეფასებით, ეს გარემოება იმაზე მიუთითებს, რომ მაღალი დონის კორუფციასთან დაკავშირებული პრობლემებები ქვეყანაში კვლავ გადაუჭრელია.
„საქართველოს ანტიკორუფციული პოლიტიკის მთავარი პრობლემები კვლავაც გადაუჭრელია“ - ამ სათაურით „საერთაშორისო გამჭვირვალობის“ სამდივნო, ახალ კვლევას აქვეყნებს. არასამთავრობო ორგანიზაციის მიერ გავრცელებული ინფორმაციის მიხედვით, ბოლო 8 წლის განმავლობაში, საქართველო „კორუფციის აღქმის ინდექსში“ თითქმის სტაბილურ ადგილს ინარჩუნებს და პროგრესი არ შეინიშნება. ასქულიანი შეფასებიდან, ქვეყანას ისევ 56 ქულა აქვს.
მაშინ, როცა ქვეყნის პრემიერი კორუფციას „ქართულ ჯიგრულ პონტს უწოდებს“, კვლევის შედეგები არ უნდა გვიკვირდეს - ამბობს, ორგანიზაცია „შეაჩერე კორუფცია“-ს დამფუძნებელი. ქეთევან ენუქიძის განმარტებით, ხელისუფლება არსებული ვითარების შეცვლას საერთოდ არ ცდილობს.
რა შედეგებამდე მივყავართ კორუფციის მაღალ მაჩვენებელს, რისკებზე და შედეგებზე ეკონომისტები საუბრობენ. ამბობენ, რომ ერთ-ერთი უპირველესი და მნიშვნელოვანი ანტიშედეგი უცხოური ინვესტიციების შემცირებაა.
ოპოზიციაში ფიქრობენ, რომ ქვეყანაში კორუფციის მაჩვენებელი გაცილებით უფრო მაღალია, ვიდრე ამას კვლევა აჩვენებს. ამბობენ, რომ „ქართულ ოცნება“ კორუფციის პრევენციისა და მასთან ბრძოლის კუთხით ქმედით და სისტემურ ნაბიჯებს არ დგამს.
„საერთაშორისო გამჭვირვალობა - საქართველო“ „ნაციონალური მოძრაობის“ ინტერესების გამტარებელი ორგანიზაციაა - ამ შეფასებით გამოუცხადა უნდობლობა კვლევას, აჭარის ერთპარტიული უმაღლესი საბჭოს დეპუტატმა. დავით ბაციკაძეს მიაჩნია, რომ საქართველოში კორუფციის მაჩვენებელი საგანგაშო არ არის.
რატომ არ ხდება ანტიკორუფციული პოლიტიკის მთავარი პრობლემების გადაჭრა? კვლევის ავტორი ორგანიზაცია აღნიშნავს, რომ პირველი მიზეზი, ერთი პოლიტიკური ჯგუფის ხელში მობილიზებული გადაჭარბებული ძალაუფლებაა. "საერთაშორისო გამჭვირვალობა-საქართველო", მიზეზებს შორის ასახელებს სხვადასხვა ინსტიტუციის, მათ შორის პარლამენტის სისუსტეს საზედამხედველო ნაწილში. ასევე, ოპოზიციის იგნორირებას და გარიყვას პოლიტიკური პროცესებიდან.