23, მარტი 2021 21:15:00
მედიაში გასული სკანდალური რეპორტაჟის შემდეგ ოცნების მთავრობის მაღალი რანგის პოლიციელმა თანამდებობა დატოვა. კახა საბანაძემ გადაწყვეტილების მიზეზი სოციალურ ქსელში განმარტა. ახსნა იმით, რომ სურს, ობიექტური გამოძიების სრულყოფილ შედეგებს დაელოდოს. საბანაძის დავალებებზე პროკურატურამ მოკვლევა უკვე დაიწყო. სუსის ყოფილი თანამშრომლის აღიარებამ შესაძლოა გახარიას კადრი 20 ივნისის საქმეზე ბრალდებულის სკამზე აღმოაჩინოს. ვინ როგორ ხედავს ქართულ პოლიტიკურ მომავალს?
თანამდებობის დატოვების მიზეზად უკვე ყოფილმა მაღალჩინოსანმა რამდენიმე დღის წინ, გასული სიუჟეტები დაასახელა. ჩანაწერებში, სავარაუდოდ, კახა საბანაძე 20 ივნისის ღამეს სამართალდამცველებს გადამცემი მოწყობილობების დაზიანებისკენ მოუწოდებდა, რათა ოპოზიციურ ლიდერებს მომიტინგეებამდე ხმა ვერ მიეწვდინათ. ხმაურიანი ბრალდებების წყარო, სახელმწიფო უსაფრთხოების სამსახურის ყოფილი თანამშრომელი ივანე გულაშვილიცაა. მისი განცხადებით, ივნისის მოვლენებისას საბანაძე ხმოვან შეტყობინებებით კონკრეტულ დავალებებს აძლევდა.
საბანაძე ჩანაწერების ავთენტურობაზე არაფერს ამბობს, ისევე როგორც სიუჟეტებში გაჟღერებულ ბრალდებებზე. თუმცა განმარტავს, რომ თანამდებობას საგამოძიებო პროცესის მიმართ ნდობის უზრუნველყოფის მიზნით ტოვებს. ამ განცხადებიდან მალევე, საგამოძიებო უწყებამ გამოძიება დაიწყო.
ოპოზიციამ კახა საბანაძის განცხადებაში ერთი მესიჯი ამოიკითხა, რომელიც მათი შეფასებით, მმართველ გუნდში შიდა დაპირისპირებაზე მიუთითებს. ამბობენ, რომ მესიჯი საბანაძემ ირაკლი ღარიბაშვილს მინიშნების სახით გაუგზავნა.
ის, რაც ოპოზიციამ კახა საბანაძის განცხადების მიღმა დაინახა, გაუგებარია მმართველი გუნდისთვის. ქართული ოცნებისთვის მთავარი საკითხი მხოლოდ ფარული ჩანაწერების თემაა, რომელიც მედიაში ვრცელდება.
კახაბერ საბანაძე შინაგან საქმეთა მინისტრის მოადგილის თანამდებობას 2017 წლიდან იკავებდა. ის ყოფილი პრემიერ–მინისტრის გიორგი გახარიას კადრად ითვლება. პოლიტიკურ კულუარებში არ გამორიცხავენ, საბანაძე გახარიას დაანონსებული პოლიტიკური გეგმების, ერთ-ერთი, მონაწილე იყოს. თუმცა, ვიდრე პოლიტიკური მომავალი გაირკვევა, ძალოვანი უწყების ყოფილი მაღალჩინოსანი, შესაძლოა, 20 ივნისის საქმეზე, ბრალდებულის სკამზე აღმოჩნდეს.