30, აპრილი 2021 19:32:00
სარეაბილიტაციო სამუშაოების გამო, ერთდროულად ჩაკეტილი ბათუმის ქუჩები. პროცესი, ქალაქის მასშტაბით, ისედაც პრობლემურ საცობს კიდევ უფრო ართულებს. შესაბამისად, მოქალაქეებს ცხოვრება გაუსაძლის დისკომფორტში უწევთ. უფრო მეტად, ადგილობრივებს, გაჭიანურებული და დროში გაწელილი სამუშაოები აწუხებთ. თითო მონაკვეთზე რეაბილიტაციისთვის, 3-დან 6 თვემდე, ხშირ შემთხვევაში კი უფრო მეტია საჭირო.
მსგავსი ხმები ქალაქში მცხოვრებლებს ყოველ დილით, „მამლის ყივილივით“ ჩაესმით. თუმცა, ერთი განსხვავებით, ხმა საღამომდე, გაუჩერებლად გრძელდება.
ეს კიდევ არაფერი. რაოდენ გასაკვირიც არ უნდა იყოს, ქალაქის მერია, ხშირ შემთხვევაში, ყოველწლიურად, ერთსა და იმავე მონაკვეთს არემონტებს. მაგალითად, აბუსერიძის ქუჩა. შავი ზღვის მოლის მიმდებარე ტერიტორია, შარშანაც ზუსტად ასე გამოიყურებოდა. რამდენიმე თვიანი აღდგენის შემდეგ კი, ისევ ძველ იერსახეს დაუბრუნდა. ინფრასტრუქტურული სამუშაოები ამ მონაკვეთზე, ჯერ კიდევ გასულ წელს დაიწყო. ახლა პროცესი გაურკვეველი მიზეზით გაჩერებულია. ყოველ შემთხვევაში, ვიდრე კადრებს ვიღებდით, აქ არავინ გამოჩენილა. სამაგიეროდ, ტერიტორია შემოღობილია და გადაადგილებაც შეუძლებელი.
მოძრაობა შეზღუდულია ჟიული შარტავასა და ფიროსმანის ქუჩების გზაჯვარედიზეც. მონაკვეთი, თვის დასაწყისში შემოიღობა. შედეგად, ვითარება ახლა ასეთია: მძღოლებს, გაზრდილი საწვავის ფონზე, გაორმაგებული მანძილის გავლა უწევთ. ამას, ისიც ემატება, რომ ბათუმში, რამდენიმე ცენტრალური ქუჩა ცალმხრივი გახდა.
ერთსა და იმავე ქუჩაზე, ყოველწლიურად მიმდინარე სამუშაოებს უკვე შეეჩვია ადგილობრივი ოპოზიცია. ერთადერთ მიზეზად, უხარისხოდ შესრულებულ სამუშაოებს ასახელებენ. მეტიც, ხელისუფლების ოპონენტები დარწმუნებულები არიან, რომ მუდმივად დაუსრულებელ პროექტებში ხელისუფლება ფულს აკეთებს. „ნაციონალურ მოძრაობაში“, მოახლებულ ტურისტულ სეზონზეც აქცენტირდებიან.
პრობლემა, რომ თითოეული ჩვენგანისთვის დისკომფორტულია, ამას აჭარის მთავრობის თავმჯდომარეც არ უარყოფს. თუმცა, თორნიკე რიჟვაძემ თავს იწონებს, რომ პანდემიის პირობებში, რეგიონი არ ჩერდება და სამუშაოებს ახორციელებს.
რატომ არ სრულდება ერთი ქუჩის რამდენჯერმე რეაბილიტირება ან რატომ ემთხვევა პროცესი ყოველდწლიურად, ტურისტულ სეზონს? პასუხი, ცხადია არ არსებობს. ბათუმის საკრებულოს ინფრასტრუქტურული განვითარების კომისიაში, საკითხზე, საუბარი არ ისურვეს.