29, სექტემბერი 2021 19:30:00
ადგილობრივი თვითმმართველობების არჩევნებამდე, სულ რაღაც, სამი დღე რჩება და პარტიები შედეგების მათთვის სასიკეთოდ დასრულებისთვის, სხვადასხვა ხერხს მიმართავენ. „ქართული ოცნება“, რომ აგიტაციაში, აქტიურადაა ჩართული, ამას ქუჩაში ყოველ ორ ნაბიჯში გაკრული ბანერებიც მოწმობს. გარდა ამისა, ხელისუფლების ოპოენტები მმართველ გუნდს წინასაარჩევნო კამპანიაში ე.წ კრიმინალური ავტორიტეტების ჩართვაში სდებენ ბრალს. გაერთიანებული ოპოზიციის ბათუმის მერობის კანდიდატმა, მსგავსი ფაქტების წარმოსაჩენად, რამდენიმე მტკიცებულება წარმოადგინა. გიორგი კირთაძის მტკიცებით, პროცესში შსს-ს თანამშრომლებიც არიან ჩართულები.
ოპოზიციური ლიდერების თქით, მმართველი პარტიის წარმომადგენლები საჯარო მოხელეებს შტაბებში ხვდებიან და მათი დახმარებით, ამომრჩევლებზე ინფორმაციის მოპოვებას ცდილობენ. ხელისუფლების ოპონენტები მიიჩნევენ, რომ ძალაუფლების დაკარგვის შიშით „ქართული ოცნება“, საკუთარი აქტივის მობილიზებას ამ გზით ცდილობს.
ერთ ერთი საჯარო მოხელე, რომელიც ბათუმის 24-ე საარჩევნო უბანზე, კარდაკარის ოქმის სიაშია და ხელსაც აწერს, ილია კონცელიძეა. იგი ვერ უარყობს, რომ საარჩევნო პროცესებში ჩართულია, თუმცა, ამომრჩევლების დაშინებასა და მუქარას კატეგორიულად გამორიცხავს. კონცელიძე, ჩვენს კითხვებს აგრესიულად პასუხობდა და წინასაარჩევნო აგიტაციაში ჩართულობის გამართლება საშვებულებო პერიოდით სცადა.
ოპოზიცია საუბრობს, ქობულეთში მომხდარ ფაქტებზეც. ბონდო თედორაძის მტკიცებით, მუნიციპალიტეტში, აზეირბაიჯანის ელჩი, ზურაბ პატარაძე სოფლის ექიმებსა და ბაღის დირექტორებს, ფულადი ჯილდოს სანაცვლოდ, სააგიტაციო პროცესში ჩართვისკენ მოუწოდებდა. აღნიშნულის ილუსტრაციისთვის, თედორაძე, შეხვედრის ვიდეო მასალას ასაჯაროებს.
რატომ ეწევა საჯარო მოხელე უკანონო საქმიანობას? კითხვით, ზურაბ პატარაძეს მივმართეთ. სატელეფონო საუბრისას ჩვენი კითხვების მოსმენის შემდეგ, საქმიანი შეხვედრა მოიმიზეზა და პასუხების გაცემის გარეშე ყურმილი დაგვიკიდა.
მმართველ გუნდში ბრალდებას ბრალდებითვე უპასუხეს. „ქართულ ოცნებაში“ ამობენ, რომ ნაციონალური მოძრაობა პროვოკაციულ ქმედებებს ეწევა. ზაალ მიქელაძის განმარტებით, საარჩევნო შტაბებში საჯარო მოხელეების ვიზიტებში გასაკვირი არაფერია. საპარლამენტო უმრავლესობის წევრი ოპონენტებს ფაქტებით საუბარს ურჩევს.
ეს პირველი შემთხვევა არაა, როცა ოპოზიცია ხელისუფლებას წინასაარჩევნო აგიტაციაში საჯარო მოხელეების ჩართვასა და უკანონო აგიტაციაში სდებს ბრალს. მაგალითად, რამდენიმე დღის წინ, „ნაციონალურმა მოძრაობამ“ „ქართული ოცნება“ გადასატანი ყუთების
სიებში ისეთი ადამიანების შეყვანაში ამხილა, რომლებსაც მსგავსი საჭიროება არ გააჩნიათ.