05, ოქტომბერი 2021 20:25:00
ქვეყნის მასშტაბით თითქმის ყველა თვითმმართველ ქალაქში მეორე ტური დაინიშნა. უმრავლესობაში მერებთან ერთად საკრებულოს წევრებიც უნდა დააკომპლექტონ. ბათუმი ის გამონაკლია, სადაც წარმოამდგენლობით ორგანოში უმრავლესობა ოპოზიციაა, თუმცა ქალაქის ხელმძღვანელის ასარჩევად მოქალაქეებს ხმის მიცემა კიდევ ერთხელ მოუწევთ. მმართველ გუნდს არჩილ ჩიქოვანი წარმოადგენს, გაერთიანებულ ოპოზიციას - გიორგი კირთაძე. ვისი მხარდაჭერისკენ მოუწოდებენ ის პარტიები, რომლებიც პოლიტიკურ ორთაბრძოლაში უკვე დამარცხდნენ? თეო ფუტკარაძე გიამბობთ.
ბათუმი, ერთ-ერთი თვითმმართველი ქალაქია, სადაც მერის ასარჩევად, მეორე ტური გაიმართება. ერთმანეთს, 30 ოქტომბრის კენჭისყრაზე, „ქართული ოცნების“ კანდიდტი არჩილ ჩიქოვანი და გაერთიანებული ოპოზიციის რჩეული გიორგი კირთაძე უპირისპირდებიან. მეორე ტურში, კანონმდებლობით, 50%-ს პლიუს ერთი, ბარიერი არ მოქმედებს. ქალაქის მერი, მომდევნო ოთხი წლით ის გახდება, რომელიც თუნდაც ერთი ხმით მეტს მიიღებს. პარტია „გირჩი - მეტი თავისუფლების“ კანდიდატი გიორგი ფუტკარაძე ამბობს, რომ მისი მხარდაჭერა გიორგი კირთაძეს ექნება, თუმცა საკუთარი პირობები აქვს.
ოპოზიციის მიერ შეთანხმებული მერობის კანდიდატის მხარესაა გია ხალვაშიც. იგი საინიციატივო ჯგუფის მიერ დასახელებული მერობის აკნდიდატი იყო. დღეს ამბობს, რომ მოუწოდებს საკუთარ ამომრჩევლებს, მხარი ცვლილებებს დაუჭირონ. განმარტავს, რომ ოპოზიციურად განწყობილი მერი, ქალაქისთვის სასიცოცხლოდ მნიშვნელოვანია. გარდა ამისა, აცხადებს, რომ ბათუმისთვის გიორგი კირთაძეს უფრო მეტი სიკთე აქვს გაკეთებული, ვიდრე არჩილ ჩიქოვანს.
პარტია „სახე პლიუსის“ მერობის კანდიდატი, ედნარ ბაგრატიონი, როგორც კირთაძისგან, ისე ჩიქოვანისგან გარკვეულ კითხვებზე პასუხებს ელოდება, და გადაწყვეტილება ამის შემდეგ უნდა მიიღოს. რა კითხვები აქვს, არ აკონკრეტებს, მხოლოდ იმას ამბოს, რომ პირველ ტურში მონაწილე კანდიდატებთან ორივემ უნდა იდებატოს.
საკუთარი ამომრჩევლისთვის მოწოდებების გაკეთებას არ აპირებენ, ექსპრემიერის პარტიაში. ირაკლი მიქელაძე მოქალაქეებს არჩევანის თავისუფლებას უტოვებს.
ბათუმში, ორ ოქტომბერს, მერობისთვის, სულ 10 კანდიდატი იბრძოდა. პირველ ტურში, გიორგი კირთაძეს, 31 443 ხმა ერგო, არჩილ ჩიქოვანს კი 30 776. მეორე ტურისთვის, 30 ოქტომბერს კი გადამწყვეტი, შეიძლება ერთი ხმაც გახდეს.