არჩევნებამდე სამი დღე დარჩა. ქვეყანაში კი პანდემია მძვინვარებს, ყოველდღიურად ვირუსს ათობით ადამიანი ეწირება. ისინი ვინც, აცრისკენ და დისტანციის დაცვისკენ მოგვიწოდებენ,აქციებს და ფართომასშტაბურ შეკრებებს თავად აორგანიზებენ. ეპიდემიოლოგიურად საფრთხის შემცველი ერთ-ერთი ასეთი ღონისძიება დედაქალაქში მმართველმა გუნდმა მხარდამჭერებთან დღეს გამართა. გამონაკლისი არც ოპოზიცია იყო, როცა ექსპრეზიდენტის გათავისუფლების მოთხოვნით რამდენიმე დღის წინ თბილისის ცენტრში ათიათასობით ადამიანი შეკრიბა. როგორც ჩანს, პოლიტიკური სუბიექტები ძალაუფლების მოპოვების ან შენარჩუნების სურვილით იმდენად დაბრმავებულები არიან, რომ ჯანმრთელობას მათთვის ჩალის ფასი აქვს.
ეს კადრები, დღეს გამართული, მმართველი გუნდის მიერ დაგეგმილი, წინასაარჩევნო შემაჯამებელი შეხვედრიდანაა. ათეულობით ათასი კაცი „ქართულმა ოცნებამ“ დედაქალაქის ცენტრში შეკრიბა. რაზე მსჯელობდნენ, ბუნდოვანია, თუმცა რაც კარგად ჩანდა ის იყო, რომ ხალხმრავალ ღონისძიებაზე მოქალაქეებს შორის დისტანცია დაცული არ იყო. პირბადეები ეკეთათ, მაგრამ, მეხუთე ტალღის პირობებში, კოვიც-19-ის გავრცელების რისკისგან, თავის დაზღვევის მთავარ არგუმენტად, ვერც ეს გამოდგება. ივანიშვილის გუნდი წინააღმდეგობაში ქვეყნის მთავარი ეპიდემიოლოგების რეკომენდაციებთან მოდის, რომლებიც მუდმივად იმას იმეორებენ, რომ მასობრივი თავშეყრა და სოციალური ღონისძიებები დროებით უნდა გადავდოთ. როგორც ჩანს, ოცნების გუნდისთვის პარტიულ ინტერესს ჯანმრთელობის ფასი აქვს.
რისკები ვერ ან არ დაინახეს ოპოზიციაში, როცა დედაქალაქში 14 ოქტომბერს ფართომასშტაბიანი აქცია „თავისუფლება მიშას“ დაგეგმეს. თავისუფლების მოედანზე, მაშინაც, ათასობით ადამიანი შეიკრიბა. ძალაუფლების მოპოვების და წინასაარჩევნოდ პარტიის პიარის სურვილი იმდენად ძლიერი აღჩმოჩნდა, რომ მთავარ ოპოზიციურ ძალას, რეგულაციები გადაავიწყდა. თბილისის ცენტრში შეკრებილთა უმრავლესობას პირბადე არ ეკეთა. დისტანციის დაცვაზე კი, თავისთავად, საუბარი ზედმეტია.
„დარჩი სახლში“, „გაუფრთხილდით ერთმანეთის ჯანმრთელობას“, „დაიცავით დისტანცია“, „ატარეთ პირბადე“ - ეპიდემიოლოგების მოწოდებები ავიწყდებათ აქციების ორგანიზატორებს. ვინ ფიქრობს ადამიანებზე, რომელთა ჯანმრთელობას ხალხმრავალ აქციებზე ყოფნით საფრთხე ექმნება? გამოდის, რომ არავინ. ბათუმის ქუჩებში გამოკითხულები ღიად ამბობენ, რომ პარტიები, მხოლოდ, ძალაუფლებასა და საკუთარ სავარძლებზე არიან ორიენტირებულნი.
ხალხმრავალ შეკრებებზე გასვლით რეგულაციებს უგულებელყოფს თავად საზოგადოებაც. ჩვენს მიერ გამოკითხულებში აღმოჩნდა ისეთიც, ვინც თქვა, რომ დიდი წილი პასუხისმგებლობა ხალხზე მოდის.
პოლიტოლოგი ამბობს, რომ მასშტაბური აქციების გამართვაზე თანხების ხარჯვით, ხელისუფლებამ თუ ოპოზიციამ ხალხისთვის ბევრი სიკეთის გაკეთებაზე თქვა უარი. გია მასალკინის მოსაზრებით, ხალხმრავალი შეკრებები პოლიტიკური პიარის ნაწილია, რომელიც ისეც მძიმე ეპიდემიოლოგიურ მდგომარეობას კიდევ უფრო გაართულებს.
კორონავირუსის პანდემიას დღემდე საქართველოში 10 ათასამდე ადამიანი ემსხვერპლა. რეგულაციების დაუცველობა ეპიდვითარებას ყოველდღიურად ართულებს. ამას კი ხელს პოლიტიკოსებიც უწყობენ. ოპოზიციური თუ მმართველი პარტიის წარმომადგენლები საკუთარი ძალაუფლების საპირწონედ ადამიანების ჯამმრთელობას რისკავენ.
5
s
s
s