გილოცავთ! თვითმმართველობის არჩევნები 2021 დასრულებულია. ჩვენ შევძელით და გამარჯვება მივიყვანეთ ბოლომდე! მოვახერხეთ და კიდევ ერთხელ დავამტკიცეთ, რომ ქართველი ხალხი მშვიდობასა და სტაბილურობას ირჩევს.
„9 წლის განმავლობაში „ქართული ოცნების“ მიერ განხორციელებულმა პროექტებმა და ქვეყნის ეკონომიკურმა წინსვლამ, შედეგი გამოიღო - არჩვნები მოგებულია. მუნიციპალური ბიუჯეტით, რეგიონული განვითარების ფონდის დაფინანსებითა და სოფლის მხარდაჭერის პროგრამის ფარგლებში, ათასობით ადგილობრივი მნიშვნელობის პროექტი განხორციელდა. მათ შორის, ბათუმშიც. გრძელდება იმ საქმეების ბოლომდე მიყვანა, რაც „ქართულმა ოცნებამ“ დაიწყო და ახლაც აქტიურ რეჟიმში მიმდინარეობს.“
ასე დაიწყებოდა, ჩვენი სიუჟეტი და „ოცნების“ ქება-დიდება, რომელიმე სახელისუფლებო, პროპაგანდისტული მედია რომ ვიყოთ. რეფერენდუმად წოდებულმა, თვითმმართველობის არჩევნებმა ჩაიარა, მაგრამ მოგატყუებთ თუ გეტყვით, რომ- მშვიდობიანად. საარჩევნო უბნებთან სიებით მობილიზებული „ოცნების“ კოორდინატორები, ე.წ. ძველი ბიჭები და მოძალადე მხარდამჭერები - საზოგადოების ეს სეგმენტი უმაგრებდა ზურგს, ამ კენჭისყრაზეც, მმართველ პარტიას.
ჟურნალისტების უფლებების დარღვევაში, „ქართული ოცნება“ საპრიზო ადგილს რომ მთელი მონდომებით ინარჩუნებს, ყოველ, ძლივს მოგებულ არჩევნებზე ცხადდება. ყველას კარგად გვახსოვს: 20 ივნისი, 5 ივლისი და კიდევ ბევრი სხვა. მაგრამ, შორს რომ არ წავიდეთ, 2 დღის წინ ჩატარებული კენჭისყრის დროს განვითარებულ მოვლენებიც ადასტურებს ამას. „ოცნების“ მხარდამჭერების, ბოდიში, 50 ლარიანი ლუარსაბების მხრიდან, ჟურნალისტებზე ძალადობის ფაქტები, საარჩევნო უბნებთან, მრავლად ვნახეთ.
„ოცნების“ ლიდერებისგან, ჟურნალისტების მიმართ უსაფუძვლო და საჯარო მოხელეებისთვის შეუფერებელი ბრალდებები, ხშირად გვსმენია. გაგიკვირდებათ და აღნიშნულ თემაზე, ჩვენც გაგვიკვირდა თორნიკე რიჟვაძის გაკვირვება. „დავინტერესტდებიო“ - შეგვპირდა და ველოდებით - როდის? შინაგან საქმეთა სამინისტროში გამოძიება უკვე დაწყებულია, საინტერესოა, რა დრო დასჭირდება გომელაურის უწყებას, კადრებზე დაფიქსირებული მტკიცებულებების მიუხედავად, საქმის დასრულებისთვის და ხომ არ შემოიდება ეს ფაქტიც, სხვა შემთხვევებივით თაროზე.
რამდენად სამართლიანად ჩატარდა არჩევნების ორივე ტური და რა დარღვევები გამოვლინდა პროცესის მიმდინარეობისას? თემაზე პარტია „ლელო საქართველოსთვის“ წევრს, ვაჟა დარჩიას ვესაუბრეთ.
მმართველი პარტიის დიდი მონდომების მიუხედავად, „ბიძინას გუნდმა“ სრული გამარჯვება მაინც ვერ მოიპოვა. საქართველოს მასშტაბით, ჯამში 6 მუნიციპალიტეტის საკრებულოში, მათ შორის ბათუმშიც, უმრავლესობის სახით, ოპოზიცია იქნება წარმოდგენილი. მოპოვებული ხმების მიხედვით, „ოცნებისა“ და ოპოზიციის კანდიდატებს შორის, სხვაობა კი, მინიმალური, ძირითადად, 2-3 პროცენტიანია. ხომ არ მიუთითებს ეს, მოსახლეობაში ხელისუფლების პოზიციების შესუსტებაზე? სადამდე მიგვიყვანს „განვითარების“ ეს გზა? ჯერ არვიცით...