15, ნოემბერი 2021 21:28:00
წყალში გადაყრილი მილიონები და უხარისხოდ შესრულებული სამუშაოები. ბათუმში, თითქმის ყველა ქუჩაზე, შეხვდებით საკანალიზაციო ლუქებს, რომლებიც მძღოლებისთვის არამარტო დისკომფორტის შემქმნელი, არამედ დაბრკოლებაც ხდება. უფუჭდებათ ავტომობილები და ხარჯებს არავინ უნაზღაურებთ. ბათუმის მერია ფაქტს ხედავს, თუმცა რეაგირებას არ ახდენს. დეტალები სალომე უსტალიშვილის სიუჟეტში.
ბათუმის მერია, ხშირად, იწონებს თავს, ინფრასტრუქტურული სამუშაოებით. ჯერ ერთ ქუჩას გადათხრიან, შემდეგ მეორეს და ასე დაუსულებლად გრძელდება წლების განმავლობაში. მაშინ, როდესაც ქუჩების ე.წ. რეაბილიტაცია დასასრულს უახლოვდება, ხშირ შემთხვევაში, უწყება, საკანალიზაციო ლუქებს, ამ მდგომარეობაში, ტოვებს, რის გამოც, მძღოლებს, ავტომობილები უზიანდებათ.
მოქალაქეები ამბობენ, რომ ხარჯებს არავინ უნაზღაურებთ. მოუწესრიგებელ ინფრასსტრუქტურასა და უპასუხისმგებლოდ შესრულებულ სამუშაოებზე კი, პასუხისმგებლობას, ბათუმის მერიას აკისრებენ. მძღოლები გვეუბნებიან იმასაც, რომ უკვე გაკეთებულ გზებს, ისევ თავიდან აკეთებენ, თუმცა, შესაბამისი სამსახურები ამოწეული საკანალიზაციო ლუქების პრობლემას ვერა და ვერ აგვარებენ.
არაფერი, რომ ვთქვათ იმ ქუჩებზე, სადაც რეაბილიტაცია მიმდინარეობს, ბათუმში, მრავალად ნახავთ ისეთ ადგილებს, სადაც ინფრასტრუქტურული სამუშაოები დიდი ხნის წინ დასრულდა, თუმცა, საკანალიზაო ლუქები, მაინც, ასე გამოიყურება. ბათუმის მერიის ინფრასტრუქტურის სამსახურში, როგორც ყოველთვის, სატელევიზიო კომენტარისთვის თავი, ამჯერადაც არ შეიწუხეს. შეტყობინების სახით კი, გვითხრეს, რომ ტექნიკური სამსახურის მიერ კონტროლი აუცილებლად განხორციელდება და შესაბამისი ღონისძიებები მალევე გატარდება.
ნამდვილად მოაგვარებენ თუ არა პრობლემას, ამას დრო გვიჩვენებს, თუმცა ფაქტია, რომ ბათუმის მერიას, ბათუმის ქუჩებში ასეთ მდგომარეობაში არსებული საკანალიზაციო ლუქები, წლების განმავლობაში, არ შეუმჩნევია.