16, ნოემბერი 2021 14:24:00
ავარიული კორპუსი რურუას პირველ ნომერში და მორიგი ტრაგედიის პოტენციური საფრთხე. ბათუმში მომხდარი, 8 ოქტომბრის, უბედური შემთხვევიდან, 40 დღეც არ გასულა და ქალაქში, კიდევ ერთ მრავალბინიან შენობაში მცხოვრები 72 ოჯახი, გუშინ ღამით, ნანგრევებში მოყოლის შიშმა ღია ცის ქვეშ გამოიყვანა. რატომ ვერ აიმედებს ბათუმის მერია მოქალაქეებს და რა ბედი ელით საცხოვრებლების დაკარგვის წინაშე მყოფ ათეულობით ოჯახს? რა ასწავლა ან ვერ ასწავლა, 26 მაისის ქუჩის ტრაგედიამ ადგილობრივ ხელისუფლებას? ვნახოთ სიუჟეტი.
რვა ოქტობრის ტრაგედია, ბათუმის მერიისთვის ავარიულ კორპუსში მცხოვრები ადამიანების დასახმარებლად გაკვეთილი არ აღმოჩნდა. რურუას პირველ ნომერში, საცხოვრებელი კორპუსის კედლებმა ნგრევა, გუშინ, ღამით დაიწყო. 72 ოჯახი რამდენიმე საათის განვალობაში, ღია ცის ქვეშ იმყოფებოდა.
მოქალაქეები ამბობენ, რომ მერიას შესაბამისი დახმარების აღმოჩენის თხოვნით რამდენჯერმე მიმართეს, თუმცა, უწყებაში უმტკიცებდნენ, რომ შენობაში ცხოვრება საფრთხეს არ წარმოადგენდა. რურუას პირველ ნომერში მცხოვრებლებს, ამის არ სჯეროდათ, რადგან სახლის, თითქმის, ყველა კედელი დაბზარულია.
შიში, რომ უსაფუძვლო არ იყო, ეს გუშინდელმა ფაქტმა აჩვენა. მოქალაქეების ნაწილი ქირით გასვლაზე უარს აცხადებს და მერიას ბინების შეძენას სთხოვს.
მოქალაქეები ამბობენ, რომ ბათუმის მერიის წარმომადგენლები, ქირით უზრუნველყოფაზე უარს ეუბნებოდნენ, მანამ, სანამ ადგილზე ჟურნალისტები მივიდოდით. მუნიციპალური სერვისების სააგენტოს ხელმძღვანელმა, ჩვენთან საუბარში კი თქვა, რომ მათზე უწყება იზრუნებს. დამატებით კითხვებზე ჯაბა ბერიძისგან პასუხები ვერ მივიღეთ.
რატომ არ მოახდინა ბათუმის მერიამ, არაერთი მიართვის მიუხედავად რეგირება, აქამდე? პასუხები არც ლელა სურმანიძეს ჰქონდა.
კითხვები უპასუხოდ დატოვა, დავით კოპინაძემაც. განსხვავებით სხვა ხელმძღვანელი პირებისგან, მან, თავის მართლება წინა საარჩევნოდ დაანონსებული პროგრამით სცადა.
ბათუმის მერიამ, 72 ოჯახიდან 40 ალტერნატიულ საცხოვრებელში, ქირით გაიყვანა. დანარჩენი კი, თავიანთი სურვილით, ამ ეტაპზე, ნათესავებთან გადავიდა. როდის ჩატარდება სახლის მდგრადობის დასადგენად ექსპერტიზა და რა ბედი ეწევათ რურუას პირველ ნომერში ფართობების მფლობელებს, სამომავლოდ, უცნობია.