18, ნოემბერი 2021 21:54:00
საჯარო მოხელეები, რიგითი მოქალაქეებისგან მაღალი შეგნებითა და მეტი პასუხისმგებლობით რომ უნდა გამოირჩეოდნენ, სადაო არაა. ამ მხრივ, ალბათ, ყველაზე მეტი კულტურისა და განათლების სფეროში დასაქმებულებს მოეთხოვებათ. წლების განმავლობაში „ქართული ოცნებისგან“ ვისმენთ, რომ წინა ხელისუფლება იყო მჩაგვრელი, მოძალადე, აგრესიული და სიძულვილით მოტივირებული. მათ წინასაარჩევნო გამოსვლებში მუდმივად ვისმენთ, რომ უნდა დასრულდეს სიძულვილი და ზიზღი. ამას აჭარის მთავრობის თავმჯდომარეც ხშირად იმეორებს.
იმ ფონზე, როცა მმართველი გუნდი, ოპოზიციის რიტორიკას იწუნებს, „ქართული ოცნების“ მაღალჩინოსნები სავარძლებიდან სიძულვილის ენით გვესაუბრებიან. ერთ-ერთი მათგანია. აჭარის განათლების სამინისტროს საერთაშორისო ურთიერთობების დეპარტამენტის ხელმძღვანელი. თეა ჭანტურიშვილს საჯარო მოხელეების პროტესტის უკიდურესი ფორმა დიეტად მიაჩნია და მათ „ნაშიმშილებ ვირთხებს“ ადარებს. ჭანტურიშვილმა სიძულვილის შემცველი დამოკიდებულება, საკუთარ სოციალურ ქსელში გაასაჯაროვა.
ცოტა ხნის წინ იგივე გააკეთა ირაკლი ღარიბაშვილმაც. ხომ არ წაახალისა მსგავსი მიდგომით, მთავრობის მეთაურმა რიგითი ჩინოვნიკი?
ოცნების მაღალჩინოსანი გამოქვეყნებული სტატუსით ადამიანების დისკრიმინაციას ახდენს. აღნიშნულს ქილიკით გამოეხმაურნენ სხვა საჯარო მოხელეებიც. მათ შორის თამარ გუდავა, იგი ბათუმის მერიის სამოქალაქო მრჩეველთა საბჭოს თავმჯდომარე და აჭარის განათლების სამინისტროს კულტურის დეპარტამენტის ხელმძღვანელია.
პოსტს უარყოფითად აფასებენ მესამე სექტორში. საერთაშორისო გამჭვირვალობა საქართველოს ბათუმის ოფისის კორდინატორი, ჭანტურიშვილს კომენტარებში გამოეხმაურა. აღმოჩნდა, რომ საჯარო მოხელის კლანი ზიზღსა და დიკრიმინაციას იწონებს და მალხაზ ჭკადუას დაბულინგებას შეეცადნენ.
ის ვინც ოპოზიციას მუდმივად, ზიზღსა და აგრესიაში ადანაშაულებს, თავად უარესს ჩადის - ამბობენ ხელისუფლების ოპონენტები. მათი თქმით, დაუშვებელია საჯარო მოხელემ, რომელსაც თმენის ვალდებულება აქვს მსგავსი ტიპის განცხადებები, საჯაროდ გააკეთოს.
აღნიშნული სტატუსი შევაფასებინეთ „უმაღლესი საბჭოს დეპუტატებსაც“. ფაქტს არ იწონებენ და ამბობენ, რომ ძალადობა, დისკრიმინაცია და ზიზღის ენა მიუღებელია ნებისმიერი მოქალაქისგან, განურჩევლად თანამდებობისა.
აჭარის უმაღლესი საბჭოს ადამიანის უფლებათა დაცვის კომიტეტის თავმჯდომარე კი ამბობს, რომ ფაქტზე, თავად აჭარის განათლების სამინისტრომ რაიმე სახის რეაგირება უნდა მოახდინოს. ცოტნე ანანიძის თქმით, საჯარო მოხლეეებს მეტი თმენის ვალდებულება მოეთხოვებათ.
ჩვენ ბუნებრივია, თავად, თეა ჭანტურიშვილის განმარტებითაც დავინტერესდით. მადისიკრიმინირებელი პოსტის ავტორი კამერებთან საუბარს გაურბის. კომენატრი არც აჭარის განათლების კულტურისა და სპორტის მინისტრმა, მაია ხაჯიშვილმა გააკეთა.