ქალაქი „თავისი კაზინოებით“ ჯერ კიდევ 3 თვის წინ, აჭარაში საქართველოს პრემიერის მინისტრის წინასაარჩევნო დაპირება იყო. დღეს ირაკლი ღარიბაშვილი თავისივე დაპირების აკრძალვაზე ალაპარაკდა. მთავრობის მეთაურმა თქვა, რომ ონლაინკაზინოების რეკლამირება და ფუნქციონირება მხოლოდ ჭარბვალიანობის და ფატალური შედეგების მომტანია
ქვეყნის პრემიერი, სულ რაღაც 3 თვის წინ გონიოში ახალი ქალაქის მშენებლობას აანონსებს. წინასაარჩევნო შეხვედრაზე ღარიბაშვილი ამბობს, რომ პროექტი კაზინოებს, სასტუმროებსა და ფინანსურ ორგანიზაციებს გააერთიანებს.
დღეს კი, საკუთარ თავთან წინააღმდეგობაში მოდის და თავისივე დაპირების აკრძალვას ზუსტად 3 თვის თავზე აანონსებს. ირაკლი ღარიბაშვილი ამბობს, რომ პირველ ეტაპზე ონლაინ-კაზინოების რეკლამირებას შეწყვეტენ. მფლობელებისთვის გაიზრდება გადასახადები, ასაკობრივი ბარიერი კი 25 წლამდე აიწევა
დავალება ფინანსთა სამინისტრომ უკვე მიიღო. ეკონომიკური გუნდი საკანონმდებლო ინიციატივას ქვეყნის პარლამენტს უახლოეს დღეებში წარუდგენს. ფინანსთა მინისტრი ამბობს, რომ აზარტული თამაშის ბიზნესის დაბეგვრისას როგორც მოგების, ასევე, ფსონების მიმართულებით განსხვავებულ მოდელს შეიმუშავებენ.
გადაწყვეტილების განხორციელების არ სჯერათ ოპოზიციაში. პარტია "ხალხისთვის" ლიდერი დარწმუნებულია, რომ ონლაინ კაზინოებზე გაკეთებული განცხადებით პრემიერი რეპუტაციის გადარჩენას ცდილობს. ანა დოლიძე ამბობს, რომ უნიჭო პოპულიზმის კარგი მაგალითი, ივანიშვილის მიერ, მის პიროვნულ შეფასებას უკავშირდება.
თითქმის იდენტური პოზიცია აქვთ „ერთიან ნაციონალურ მოძრაობაში“. პრემიერის განცხადებას პოპულისტური მიზნებით ხსნის მირდატ ქამადაძე და მიაჩნია, რომ მსგავსი აკრძალვებით შედეგის მიღწევა შეუძლებელია.
აზარტული თამაშების რეკლამირებას 2020 წელს საინიციატივო ჯგუფი "სტუდენტები აზარტული თამაშების წინააღმდეგ" ეწინააღდეგებოდა. ბათუმის საკრებულოში დარეგისტრირებული პეტიცია მუნიციპალურ ავტოტრანსპორტზე ტოტალიზატორების, კაზინოებისა და ონლაინ კაზინოების ბანერების განთავსებაზე აკრძალვის შემოღებას ითხოვდა. ავტორები მიიჩნევდნენ, რომ პრობლემა ფატალურ შედეგებს იწვევს, რაზეც ხელისუფლებას მკვეთრი რეაგირება უნდა ჰქონდეს
საკანონმდებლო დონეზე აზარტული თამაშების უკონტროლო ბიზნესის რეგულირებას წლებია ითხოვს არასამთავრობო ორგანიზაცია „დედები აზარტული თამაშების წინააღმდეგ“.
აზარტულ თამაშებზე დამოკიდებულება ანუ "ლუდომანია" საქართველოში დიდი პრობლემაა, განსაკუთრებით არასრუწლოვნების მიერ ოჯახის წევრების პირადი მონაცემებით სარგებლობის კუთხით. უახლესი სტატისტიკური მონაცემებით საქართველოში აზარტულ თამაშებში 700 000 -დან 1 000 000 პირამდეა ჩართული, რასაც ჭარბვალიანობამდე, ხშირ შემთხვევაში კი ფატალურ შედეგებამდე მივყავართ. 2020 წლის 1-ლი იანვრიდან, საქართველოს საზოგადოებრივი მაუწყებლის ეთერით, აზარტული თამაშების რეკლამირება აიკრძალა.
1
s
s
s