11, დეკემბერი 2017 20:09:00
კიევში მიხეილ სააკაშვილის სასამართლო პროცესი მიმდინარეობს. მოსამართლე საქართველოს მესამე პრეზიდენტისთვის აღკვეთის ღონისძიების შეფარდების შესახებ მსჯელობს. პროკურატურამ მოითხოვა სააკაშვილს ორთვიანი შინა პატიმრობა შეუფარდონ და უსაფრთხოების დამატებითი ზომისთვის, მას ელექტრონული სამაჯური დაუმაგრონ. საააკშვილის უფლებებს სამი ადვოკატი იცავს. დაცვის მხარის ადვოკატებს რამდენიმე შუამდგომლობა მოსამართლემ არ დააკმაყოფილა. ადვოკატები პროკურორის აცილებას მოითხოვდნენ. ამ ეტაპზე მოსამართლემ მხოლოდ ერთი შუამდგომლობა დააკმაყოფილა. მოსამართლემ სააკაშვილს სასამართლო დარბაზში არსებული საპატიმრო კაბინიდან გამოსვლის საშუალება მისცა. იგი სხდომის დარბაზში, ადვოკატების გვერდით იმყოფება, რომელთა განმარტებით, მიხეილ სააკაშვილი პროცესუალური დარღვევებით დააკავეს. სააკაშვილის აღკვეთის ღონისძიების შეფარდებაზე გადაწყვეტილებას სასამართლო, სავარაუდოდ კიევის დროით 22:30 საათამდე მიიღებს. პროცესის პარალელურად სასამართლოს გარეთ ოდესის ყოფილი გუბერნატორის მხარდამჭერთა აქცია მიმდინარეობს.