07, თებერვალი 2018 17:20:00
აჭარის მთავრობის თავმჯდომარემ საქართველოში თურქეთის გენერალურ კონსულთან მაქბულე ქოჩაკთან შეხვედრაზე სარფის საბაჟოზე არსებული სიტუაცია და თურქეთ-საქართველოს თანამშრომლობის დეტალები განიხილა. შეხვედრისას, მხარეებმა კიდევ ერთხელ გაუსვეს ხაზი იმ გარემოებას, რომ ორ ქვეყანას შორის მიმოსვლა კვლავაც ძველი წესით მიმდინარეობს და ეს მხარეების კოორდინირებული და შეთანხმებული მუშაობის შედეგია. შეხვედრაზე საუბარი ასევე შეეხო სარფის საკონტროლო გამშვებ პუნქტზე მიმდინარე სარეკონსტრუქციო სამუშაოებს, რომლის დასრულების შემდეგ საზღვრის კვეთა გამარტივდება. შესაბამისი ვიდეომასალა და ინფორმაცია აჭარის მთავრობის აპარატმა გაავრცელა.