16, მარტი 2018 14:10:00
დიმა ბილანმა ბათუმი უკვე დატოვა. მომღერალის მონაწილეობით გუშინ, სასტუმრო "შერატონში" კონცერტი გაიმართა. რუსეთის პრეზიდენტის, ვლადიმირ პუტინის მხარდამჭერმა მომღერალმა კორპორატიულ საღამოზე იმღერა. “ბათუმში მივფრინავ, სადაც მამაჩემი საზღვაო სასწავლებელში მსახურობდა”, – დაწერა დიმა ბილანმა თავის ინსტაგრამის ოფიციალურ გვერდზე აჭარაში ჩამოსვლამდე. მომღერალი ბათუმის საზღვაო აკადემიაშიც იმყოფებოდა, სადაც მან ფოტო არქივი და შენობა დაცვის თანამშრომლის დახმარებით დაათვალიერა. ბილანი ცნობილია, როგორც რუსეთის პრეზიდენტის მხარდამჭერი მომღერალი. "მაცნეს" გადამღები ჯგუფი კონცერტზე არ დაუშვეს. კომენტარისგან თავი შეიკავეს ღონისძიებაზე მიწვეულმა სტუმრებმაც. აჭარის მთავრობის პრესცენტრში განმარტეს, რომ რუსი მომღერალი რეგიონში მათი მოწვევით არ ჩამოსულა და ღონისძიებასთან ისინი კავშირში არ არიან.