დეკანოზ გიორგი მამალაძეს სახალხო დამცველი შეხვდა. ომბუდსმენის განცხადებით, დაკავებული ბრალს უსაფუძვლოდ მიიჩნევს და აცხადებს, რომ მას ციანიდი არ ჰქონია. უჩა ნანუაშვილის განცხადებით, დეკანოზი გიორგი მამალაძე ბრალს არ აღიარებს. მასთან საუბრისას კი დეკანოზმა აღნიშნა, რომ როდესაც მას ბრალი გააცნეს, ბრალში სასულიერო პირზე საუბარი არ ყოფილა. ომბუდსმენის თქმით, საქმესთან დაკავშირებით ბევრი კითხვა ჩნდება. სახალხო დამცველი საგამოძიებო უწყებებს მოუწოდებს, უფრო მეტი ინფორმაცია გახდეს საჯარო. ამასთან, მისივე თქმით, დეკანოზის დაკავება, სავარაუდოდ, პროცედურული დარღვევებით მოხდა. როგორც მისთვის ცნობილი გახდა, დეკანოზს ერთი ზარის განხორციელების უფლება არ მისცეს და ბრალი თავის დროზე არ გააცნეს. დეკანოზი გიორგი მამალაძე ოჯახის უსაფრთხოების გარანტიებს ითხოვს.
1
s
s
s