27, თებერვალი 2017 20:39:00
ე.წ. ციანიდის საქმეზე დაკავებული დეკანოზი გიორგი მამალაძე გამოძიების შეკითხვებს პასუხობს. მატროსოვის ციხეში ბრალდებულთან ადვოკატები და პროკურორები დილის 11 საათიდან იმყოფებიან. დაკითხვის პერიოდში შესვენებაზე ციხის შენობიდან გამოსულმა ბრალდებულის ადვოკატებმა ჟურნალისტებთან განაცხადეს, რომ მამალაძემ რამდენიმე სახელი და გვარი დაასახელა, თუმცა ამ ეტაპზე გიორგი ფანცულაია მათი გასაჯაროებისგან თავს იკავებს. მისივე თქმით, შეკითხვები შორენა თეთრუაშვილთან დაკავშირებითაც დაისვა, თუმცა კითხვების შინაარსს არ აკონკრეტებს. ადვოკატების მტკიცებით, ბრალდებული დეკანოზის ჩვენება ე.წ. ციანიდის საქმეს სრულიად შეცვლის. პროკურატურა კი დაცვის მხარეს სპეკულაციაში ადანაშაულებს. პროკურორის, ჯარჯი წიკლაურის თქმით, ადვოკატებმა ხელოვნური აჟიოტაჟი ატეხეს, თითქოს გამოძიება დაკითხვის პროცესს ხელოვნურად აჭიანურებს. პროკურორი პატრიარქის დაცვის ყოფილი უფროსის სოსო ოხანაშვილის საკითხსაც შეეხო და განაცხადა, რომ გამოძიების პროცესში სხვა ადამიანების დაპატიმრებაც არ არის გამორიცხული.