17, ოქტომბერი 2018 20:19:00
ბადრი პატარკაციშვილის მკვლელობის საქმე გაიხსნა. პროკურატურა ბიზნესმენის მკვლელობაში მიხეილ სააკაშვილის ხელისუფლების ბრალეულობას ხედავს. ვინ დააკავეს და რამდენი შეეფარდათ დაკავებულებს?
ბადრი პატარკაციშვილის მკვლელობის მომზადების საქმე გახსნილია. საგანგებო ბრიფინგზე, რომელიც დღეს პროკურატურაში ჩატარდა, ორი ფარული აუდიოჩანაწერი გამოაქვეყნეს, რომელშიც ნათქვამია, რომ ბიზნესმენის მკვლელობა მიხეილ სააკაშვილის მიერ იყო სანქცირებული.
სწორედ ეს აუდიოჩანაწერებია პროკურატურის მთავარი მტკიცებულება. პირველ მათგანში კონსტიტუციური უსაფრთხოების დეპარტამენტის მაღალჩინოსანი გიორგი დგებუაძე ბადრი პატარკაციშვილის დაცვის წევრს ესაუბრება, რომლის ვინაობას პროკურატურა არ ამხელს.
საუბრისას დგებუაძე, რომელიც ცდილობს დაცვის წევრი გადმოიბიროს, ამბობს, რომ პატარკაციშვილის მკვლელობის მომზადების საკითხი საქართველოს იმდროინდელი პრეზიდენტის მიხეილ სააკაშვილის მიერ არის სანქცირებული, რადგან ბიზნესმენი მათი პოლიტიკური ოპონენტი და ხელისუფლების დაუძინებელი მტერია.
რაც შეეხება მეორე აუდიომასალას - მასში ე.წ. „მოდულის“ შენობაში გამართული თათბირია ჩაწერილი, რა დროსაც კუდის მაღალჩინოსნები პოლიტიკური სივრციდან ჩამოშორების მიზნით, ბადრი პატარკაციშვილის მკვლელობის სხვადასხვა გზებზე მსჯელობენ. კერძოდ, ბიზნესმენის ისეთი ნივთიერებით მოწამვლაზე, რაც ბუნებრივი სიკვდილის ეფექტს გამოიწვევს.
როგორც ირკვევა, ეს ჩანაწერები პროკურატურას უკვე 2 წელია აქვს. უწყებაში ამბობენ, რომ 2016 წელს ამოღებულ ათეულობით ფაილს ექსპერტიზები სჭირდებოდა.
დღესვე პროკურატურაში განაცხადეს, რომ ბადრი პატარკაციშვილის მკვლელობის მომზადების საქმეზე დაკავებულია კონსტიტუციური უსაფრთხოების დეპარტამენტის ყოფილი მაღალჩინოსანი გიორგი მერებაშვილი. ამავე საქმეზე ბრალი წაუყენეს კუდის კიდევ ორ ყოფილ მაღალჩნოსანს, ლევან ქარდავასა და რევაზ შიუკაშვილს, თუმცა სისხლის სამართლის სხვა საქმეებზე მათ პატიმრობა უკვე შეფარდებული აქვთ.
შეგახსენებთ, ბიზნესმენი ბადრი პატარკაციშვილი 2008 წელს ბრიტანეთში, საკუთარ სახლში გარდაცვლილი იპოვეს. მაშინვე ითქვა, რომ მკვლელობა მიხეილ სააკაშვილის ხელისუფლების მიერ, მათ შორის, მოწამვლის გზით იყო ორგანიზებული. თუმცა ბრიტანეთის პოლიციის ოფიციალური დასკვნით პატარკაციშვილი გულის შეტევით გარდაიცვალა.