14, თებერვალი 2020 21:41:00
სამართლიანობის აღდგენა თუ ადამიანების დევნა - ვითარება საზოგადოებრივი მაუწყებლის აჭარის ტელევიზიაში. საინფორმაცო სამსახურის უფროსის, შორენა ღლონტის მიმართ, დისციპლინური წარმოება დაიწყო. უქმდება საინფორმაციო სამსახურის უფროსის მოადგილისა და მთავარი გამოშვების რედაქტორის - მაია მერკვილაძის შტატიც. თანამშრომლები ნათია ზოიძის სამსახურიდან იძულებით წასვლის შემდეგ, არასასურველი ადამიანების დევნის გაგრძელებაზე საუბრობენ. ჟურნალისტები პროცესებს სარედაქციო პოლიტიკის ცვლილების მცდელობას უკავშირებენ. რა არგუმენტები აქვს მმართველ რგოლს? სიუჟეტიდან შეიყობთ.
აჭარის ტელევიზიის თანამშრომლები ხელმძღვანელობის მხრიდან არასასურველი ადამიანების დევნის დაწყებაზე საუბრობენ. მთავარი საინფორმაციოს წამყვანმა დღეს საჯარო პოსტი გამოაქვეყნა, სადაც მაუწყებელში მიმდინარე ქაოსურ პროცესზე ღიად ყვება. თეონა ბაკურიძე შეფარულ რეორგანიზაციაზე პასუხისმგებლობას უმაღლეს საბჭოსა და მმართველ გუნდს აკისრებს.
მაია მერკვილაძე მიმდინარე პროცესებს პოლიტიკურ დაკვეთად მიიჩნევს, რომელსაც, მრჩეველთა საბჭო და მაუწყებლის დირექტორი ასრულებს. საინფორმაციო სამსახურის უფროსის მოადგილე ამბობს, რომ პროცესები სარედაქციო პოლიტიკის ცვლილებისკენაა მიმართული.
სტრუქტურული რეორგანიზაციის მცდელობის გაგრძელება - ასე აფასებს ნაციონალური მოძრაობის კვოტით არჩეული ბორდის წევრი, მიმდინარე მოვლენებს. გია ქარცივაძე ამბობს, რომ ხელმძღვანელობის მხრიდან მიღებული მსგავსი გადაწყვეტილებები, ცალკეული ადამიანების დაშინებისკენაა მიმართული.
სხვა განმარტებას აკეთებს ბორდის კიდევ ერთი წევრი მმართველი გუნდის კვოტით - თამილა დოლიძე. განმარტავს, რომ მისი ინტერესი მხოლოდ სამართლიანობის აღდგენაა. იგი ეჭვქვეშ აყენებს გადაცემა „სათქმელისთვის“ ერთი წლის წინ, „ენ-დი-აისა“ და შორენა ღლონტს შორის დადებულ ხელშეკრულებას.
მაუწყებლის დირექტორის თქმით, დარღვევების შესახებ ინფორმაცია მრჩეველთა საბჭომ მიაწოდა. გიორგი კოხრეიძე ირწმუნება, რომ ორგანიზაციაში უკანონო არაფერი მოხდება.
საკითხს „საერთაშორისო გამჭვირვალობა-საქართველო“ გამოეხმაურა. ორგანიზაციაში აჭარის ტელევიზიის დირექტორსა და მრჩეველთა საბჭოს კრიტიკულად განწყობილი თანამშრომლების დევნის შეწყვეტისკენ მოუწოდებენ და ურჩევენ მმართველბა კონსესუსის საფუძველზე განახორციელონ.