აჭარი ერთპარტიული უმაღლესი საბჭოს მომდევნო 4 წლიანი მმართველობა ყველასთვის კარგად ნაცნობი დეპუტატებით დაკომპლექტდა. 21 წევრიდან წარმომადგენლობით ორგანოში მხოლოდ 14 შევიდა. მათი უმეტესი ნაწილი წინა მოწვევის შემადგენლობაში იყო. რა ინიციატივებით დაიწყეს დეპუტატებმა დაკისრებული პასუხსმგებლობის შესრულება და რას გეგმავენ მომდევნო 4 წლის განმავლობაში რეგიონის სასიკეთოდ? სულხან მესხიძე არკვევდა.
გიორგი მანველიძე აჭარის წარმომადგენლობით ორგანოში მეორედ მოხვდა, ტრადიციას ამჯერადაც არ ღალატობს. ტელეკამერებისა და ჟურნალისტების კითხვებს გაურბის. ჩრდილში მყოფი დეპუტატი აქტიურობით არც წინა მოწვევის უმაღლესი საბჭოს სხდომებზე გამოირჩეოდა, მხოლოდ რამდენიმე ინიციატივის თანაავტორია. არც დღეს იცის რას გააკეთებს მომდევნო 4 წლის განმავლობაში, თუმცა ცნობილია, რომ მდუმარე დეპუტატს მმართველმა პარტიამ ფრაქცია "ქარული ოცნების" ხელმძღვანელის პოსტი უკვე ანდო.
ინიციატივებზე საუბარი ნაადრევად მიაჩნია ერთპარტიული უმაღლესი საბჭოს კიდევ ერთ დეპუტატს. დავით თედორაძე გვარწმუნებს, რომ საკანონდებლო წინადადებები აუცილებლად ექნება, თუმცა რა სახის ამ ეტაპზე დაკონკრეტება გაუჭირდა.
ბევრ ინიციატივას აანონსებს უმაღლესი საბჭოს მეორე მოწვევის დეპუტატი ირაკლი ჭეიშვილი და კოლეგების მსგავსად კონკრეტიკას ერიდება.
აჭარის წარმომადგენლობით ორგანოში ახალბედა დეპუტატია მარინე გვიანიძე. მისთვის განკუთვნილი სავარძელი სხდომის დაწყებამდე რამდენიმე წუთით ადრე მოირგო. იგი საბიუჯეტო და ეკონომიკურ საკითხთა კომიტეტს უხელმძღვანელებს. როგორც თავად ამბობს, ინიციატივებს მას შემდეგ გაახმოვანებს, როდესაც გუნდთან ერთად ყველაფერს დაალაგებს.
საკანონდებლო ორგანოში საქმიანობა მისთვის სიახლეს არ წარმოადგენს. პარლამენტიდან უმაღლეს საბჭოში გადმოინაცვლა და გენდერული საბჭოს უხელმძღვანელებს. ჯერ არ იცის რას გააკეთებს ქალებისთვის. ფატი ხალვაშს კოლეგების მსგავსად კონკრეტული ინიციატივის დასახელება გაუჭირდა.
ინიციატივების დასახელებისას კატეგორიული აღმოჩნდა ერთპარტიული უმაღლესი საბჭოს დეპუტატი დავით ბაციკაძე. განათლების კომიტეტის თავჯდომარემ გვითხრა, რომ ახალ ამბავს წინასწარ არ მოგვცემს.
ხელვაჩაურში მიწის რეგისტრაციის პროცედურების გამარტივების პირობას დებს ნადიმ ვარშანიძე, ერთპარტიული უმაღლესი საბჭოს ახალი მოწვევის დეპუტატი, თუმცა რა ფორმით გამოიხატება მისი თანამონაწილეობა პროცესში და რა სახის ინიციატივა ექნება ამ კუთხით ჯერ ვერ ამბობს.
მაღალმთიანი აჭარის მაჟორიტარი კი ჯერ უმაღლესი საბჭოს მუშაობის სპეციფიკის გაცნობას გეგმავს, რის შემდეგაც როგორც თავად ამბობს კონკრეტული ინიციატივები ექნება.
წინა მოწვევის უმაღლესი საბჭოს ინიციატივებით გამორჩეული ერთ-ერთი დეპუტატი გრანტების შესახებ საქართველოს კანონში ცვლილების განხორციელებას აპირებს, რაც ვლადიმერ მგალობლიშვილის თქმით, აჭარაში ერთ-ერთ ორგანიზაციას საქმიანობას გაუადვილებს.
ადამიანის უფლებათა დაცვის კომიტეტის თავჯდომარე მთავარ მიღწევად იმას ჩათვლის თუ მომდევნო ოთხი წლის განმავლობაში მისი ინიციატივა კოლეგების მხრიდან მხარდაჭერილი იქნება. ცოტნე ანანიძე სასამართლოში პატიმრისა და ადვოკატის შეხვედრისთვის ოთახის გამოყოფის აუცილებლობას ხედავს. დეპუტატი ამბობს, რომ ამით მხარეებს შორის შეჯიბრობითობის პრინციპი გაიზრდება.
რთულია იმის პროგნოზი რამდენად ეფექტიანი იქნება ერთპარტიული უმაღლესი საბჭოს საქმიანობა, თუმცა ცხადია კრიტიკისგან დაცლილ წამომადგენლობით ორგანო ერთი პარტიის 14 წევრს მუშაობა კომფორტის ზონაში მოუწევთ.
1
s
s
s