ჩვენს ეთერში, ბევრჯერ მოგისმენიათ მეწყერ საშიშ ზონაში მცხოვრებლების ისტორიები. ადამიანების, რომლებიც გასაჭირში ხელისუფლებამ ბედის ანაბარა დატოვა. დღეს ჩვენ ხელვაჩაურში, სოფელ ფერიაში მყოფი მიქელაძეების გასაჭირზე მოგიყვებით. მათზე ზრუნვა მუნიციპალიტეტის მერიის მოვალეობაა, თუმცა რამდენად ასრულებს ნაკისრ ვალდებულებას ხელმძღვანელობა, ეს -სადაოა. 7 წევრიანი ოჯახი ჯუმბერ ვარდმანიძეს უკვე ოთხი წელია დახმარებას სთხოვს. სახლს საძირკველი ნელ-ნელა ეცლება. მერი კი, ჩვენს კითხვებს, როგორც ყოველთვის გაურბის. ფეშენებელური საცხოვრებლის მფლობელს, სავარაუდოდ,უჭირს იმის გაგება, როგორია შიშით დაძინება.
ნიაზ მიქელაძე ხელვაჩაურის მერის ფიცმა დააიმედა, თუმცა, როგორც ჩანს ჯუმბერ ვარდმანიძემ დაპირება, მხოლოდ, პირობად დატოვა და მის განხორციელებაზე აღარ იზურუნა. მეწყერ საშიშ ზონაში, მცხოვრები მიქელაძეების უსაფრთხოებაზე ხელვაჩაურის მერიაა პასუხისმგებელი. ვარდმანიძის უწყებაში, ანალოგიური გამოწვევების წინაშე მყოფი ოჯახების სია გრძელია. რაზეც, ჩვენს მიერ მომზადებული არაერთი სიუჟეტიც მოწომობს.
მუნიციპალიტეტში მცხოვრები მოქალაქეების დიდი ნაწილი ირწმუნება, რომ მერია მათი პრობლემებით არ ინტერესებდა. იგივეს ამბობს ნიაზ მიქელაძეც. მის სახლს საძირკველი ნელ-ნელა ეცლება, თუმცა, აქ, ფერდსამაგრი სამუშაოებიც კი, არ დაწყებულა.
ავარიულ სახლში შვიდი ადამიანი ცხოვრობს. მათ შორის ოთხი არასრულწლოვანი. ოჯახი სოციალურად დაუცველია. სიცოცხლის გადასარჩენად, ფერდსამაგრი სამუშაოების დაწყების სახსრები თავად არ გააჩნიათ. არადა 2017 წლიდან დღემდე, სამხარაულის ექპერტიზის ბიუროს მიერ ჩატარებულ არაერთ დასკვნაში წერია, რომ სახლი ფერდსამაგრ სამუშაოებს საჭიროებს.
ჩვენ ყველა მომდევნო წლის დასკვნა საგულდაგულოდ წავიკითხეთ. ბოლო საინჟინრო-გეოლოგიურ დოკუმენტში წერია, რომ მეწყრული პროცესების სტაბილიზაციის მიზნით, შენობის ქვედა მხარეს, მთელი პერიმეტრის გამაგრებაა საჭირო.
კითხვებზე პასუხების მოსასმენად, ბუნებრივია ხელვაჩაურის მერს დავუკავშირდით. ვარდმანიძეს იმის გასახსენებლად, თუ ვინ არის ნიაზ მიქელაძე, არც საბუთებში ჩახედვა და არც დიდი დრო დასჭირვებია. როგორც გითხარით, ოჯახის მძიმე ვითარებაში ოთხი წელია იმყოფება. ამჯერად, პანდემია ვერა, თუმცა, მერმა სიტყვის მასალად ეტაპობრივი სამუშოები მოიმიზეზა. დამატებითი კითხვების დასმის საშუალება კი, არ მოგვცა.
ეს პირველი შემთხვევა არაა, როდესაც ხელვაჩაურის მერი „მაცნე“-ს გადამღებ ჯგუფს გაურბის. იმის იმედი, რომ ვარდმანიძისგან დამაიმედებელ პასუხს მოისმენდა, არც ოჯახს ჰქონდა. მიქელაძეების ისტორია, “TV25”- მა მაყურებელს 2019 წელსაც უამბო. საინტერესოა რითი იმართლებს თავს, ჯუმბერ ვარდმანიძე, იმ შემთხვევაში, თუ კი, ოჯახის შიში გამართლდება.