23, მარტი 2021 21:59:00
რამდენიმე წლის წინ საქართველოში მარიხუანას დეკრიმინალიზება მოხდა, ანუ კანაფის მოხმარება სისხლის სამართლებრივად დასჯადი აღარაა, თუმცა ეს არც მის ლეგალიზებას ნიშნავს. მაშინ ამ საკითხმა საზოგადოების საკმაოდ დიდი ნაწილის გაღიზიანება გამოიწვია. ამის მიუხედავად, დღეს ამ მავნე ჩვევაზე ათასობით ახალგაზრდაა დამოკიდებული. სტატისტიკაც მზარდია. საფრთხეებზე ღიად საუბრობენ ექიმი- ნარკოლოგები, ფსიქოლოგები, იურისტები. ყველა ერთად თანხმდება იმას, რომ ზიანი გაცილებით დიდია, ვიდრე სარგებელი.
ერთი შეხედვით, უწყინარი მწვანე ბალახი, 100-ზე მეტ ფსიქოტროპულ ნივთიერებას შეიცავს. მათგან, ადამიანის გუნება-განწყობილებაზე ყველაზე მეტად, ტეტრაჰიდროკანაბინოლი მოქმედებს. ეს უკანასკნელი კი ტვინის უჯრედების ფუნქციონირებას აფერხებს. კერძოდ, ზეგავლენას ახდენს იმ უბნებზე, რომლებიც მეხსიერებაზე, შეგრძნებებზე, კოორდინაციასა და განსჯის უნარზე არიან პასუხისმგებლები.
მარიხუანას გამოყენება როგორც დადებითად, ისე უარყოფიად შეიძლება. სპეციალისტები თანხმდებიან, რომ მისი ზიანი უფრო მეტია. კანაფის მოხმარება იწვევს სუნთქვის პრობლემებს, გულისცემის გახშირებას, ორთოსტატიკურ ჰიპოტენზიას, ჰალუცინაციებს, პარანოიას. ამძიმებს შიზოფრენიის სიმპტომებს.
ფსიქოლოგების შეფასებით, კანაფის მოხმარება განსაკუთრებით სახიფათო მოზარდებისთვისაა. ამბობენ, რომ მარიხუანას მოწევა მეხსიერებას ისევე შლის, როგორც საშლელი ნახატს. მათივე განმარტებით, კანაფის რეგულარულმა მოხმარებამ, ახალგაზრდები, შესაძლოა ფსიქიკურ აშლილობამდეც კი მიიყვანოს. იწვევს მენტალური ჯანმრთელობის ისეთ პრობლემებს, როგორიცაა დეპრესია, შფოთვა და სუიციდის მცდელობა. მარიხუანას ხშირმა მოწევამ, შესაძლოა სხვა უფრო ძლიერი ნარკოტიკული საშუალებების მოთხოვნაც გამოიწვიოს.
მიუხედავად არსებული საფრთხეებისა, რამდენიმე წლის წინ, საქართველოში მარიხუანას მოხმარება დეკრიმინალიზირებული გახდა. კანონის მიხედვით, მისი მოწევა საკუთარ საცხოვრებელ სახლში აღარ იკრძალება, თუმცა, კვლავ დაუშვებელია შეძენა-შენახვა და კულტივიზაცია. საკითხავია, რას ცვლის ამ შემთხვევაში მხოლოდ მოწევის უფლება? იურისტები, კანონში არსებულ ხარვეზებზე საუბრობენ.
სპეციალისტების თქმით, მარიხუანას დეკრიმინალიზირების შემდეგ, კანაფზე დამოკიდებულთა რიცხვი საგრძნობლად გაიზარდა. მომხმარებლებში, განსაკუთრებით, ახალგაზრდები ჭარბობენ.