მრავალფუნქციური სახლი, რომელიც მდინარის პირას შენდება. 3 სართულიანი ობიექტი ქობულეთში, აჭყვას სიახლოვეს იქნება. ეკოლოგები საფრთეებზე უკვე ალაპარაკდნენ, მერიამ კი ნებართვა ისე გასცა, რომ გეოლოგიური დასკვნა ხელში არ აქვს.
რუსთაველის ქუჩის 47 ნომერში სამსართულიანი სახლის საძირკველი დაახლოებთ ორი თვის წინ ჩაიყარა. მრავალფუნქციური ნაგების პირველი სართულის მშენებლობა თითქმის დასრულებულია. ტერიტორიაზე განთავსებული საინფორმაციო ბანერის მიხედვით, სამშენებლო პროცესი აქ 2020 წლის მაისში უნდა მორჩეს. სახლის მეპატრონე ლოლიტა ულუსოისია, რომელსაც ვკითხეთ, რის საფუძველზე მიიღო მშენებლობის ნებართვა. მან კომენტარზე უარი განაცხადა, თუმცა პირად საუბარში განმარტა, რომ მშენებლობა კანონიერად დაიწყო.
მდინარის ადიდების შედეგად, დასახლებაში ათეულობით მცხოვრები ყოველწლიურად მნიშვნელოვნად ზარალდება. წყალი აქ პირველ სართულს ნაწილობრივ ფარავს. ამას კი რუსთაველის ქუჩაზე მცხოვრებლების თქმით, მდინარის გაუწმენდავი კალაპოტი და დამცავი ჯებირის არარსებობა იწვევს.
ეკოლოგები იმ საფრთეხებზე საუბრობენ, რაც სტიქიის დროს შესაძლოა განვითარდეს, წყალმოვადნამ საცხოვრებელს საძირკველი გამოაცალოს. მდინარე აჭყვა წყალუხვობით გამოირჩევა ამიტომ, კახა გუჩმანიძის თქმით, მუნიციპალიტეტს ნებართვის გაცემამდე რისკები სათანადოდ უნდა შეეფასებინა. სპეციალისტი ეკოლოგების და ურბანისტების დასკვნის აუცილებლობაზეც საუბრობს.
ოპოზიცია ტრადიციულად კორუფციაზე საუბრობს. საკრებულოს დეპუტატის თქმით, მუნიციპალიტეტის მერია პროექტებს ისე ამტკიცებს, რომ მასში სპეციალსიტების დასკვნები და რეკომენდაციები არ არის გათვალისწინებული.
ქობულეთის მერის მოადგილე თავდაპირველად გვარწმუნებდა, რომ ნებართვა გეოლოგიური დასკვნის საფუძველზე, კანონდებლობის მოთხოვნის შესაბამისად გაიცა. დავით ვერულიძეს ამის დამადასტურებელი დოკუმენტაციის წარდგენა ვთხოვეთ, რაზეც ინფორმაციის დაზუსტებას უწყების არქიტექტურის სამსახურთან შეეცადა. მოგვიანებით აღმოჩნდა, რომ გეოლოგიური კვლევა მეპატრონისთვის არავის მოუთხოვია.
ის, რომ დასახლება უხვი ნალექის დროს იტბორება მშენებლობის ნებართვის გაცემაზე უარის თქმის საფუძველი არ უნდა გახდეს - ასე ფიქრობს მუნიციპალიტეტის მერის მოადგილე. დავით ვერულიძე იმედოვნებს, რომ ორი წლის შემდეგ მდინარე აჭყვას კალაპოტის რეაბილიტაცია დასრულდება, რაც პრობლემას სრულად მოაგვარებს.
მრავალფუნქციური სახლი მდინარის კალაპოტიდან 5 მეტრში - ტურისტებს დაახლოებით 2020 წლიდან უმასპინძლებს. რამდენად უსაფრთხო იქნება აქ ცხოვრება მეპატრონისთვის ეს მდინარე აჭყვას კალაპოტის გამტარუნარიანობასა და კლიმატურ პირობებზე იქნება დამოკიდებული.
„წყლის შესახებ“ საქართველოს კანონის მეთხუთმეტე მუხლის თანახმად, აკრძალულია მდინარის სიახლოვეს და მათი სანიტარიული დაცვის ზონებში საწარმოო და საყოფაცხოვრებო ნარჩენების დაგროვება, ჩამდინარე წყლებით მორწყვა, ისეთი ობიექტების მშენებლობა და სხვაგვარი საქმიანობა, რომელმაც წყლის გაბინძურება შეიძლება გამოიწვიოს.
27
s
s
s